Óskemenniń saýda, oıyn-saýyq oryndary erikti tekserýden ótedi
ÓSKEMEN. QazAqparat - Óskemendik tótenshe jaǵdaı mamandary saýda jáne oıyn-saýyq ortalyqtarynyń ókilderin jınap, órt qaipsizdigi máselesin talqylady, dep habarlaıdy QazAqparat tilshisi.
Qalanyń ákimi Qýat Tumabaevtyń bastamasymen ótken jıynda atalmysh nysandardy órt qaýpipsizdigine tekserý kezinde jıi kezdesetin olqylyqtar ataldy.
Qalalyq tótenshe jaǵdaılar departamentiniń basshysy Aqylbek Muhaevtyń aıtýynsha, ótken jyldyń qazanynda qaladaǵy tanymal saýda orny sanalatyn «Muztaý» kesheninde tokpen qamtý júıesinen órt shyǵyp, 0,5 sharshy metr jerdi ot sharpyǵan. Halyqtyń qarasy úzilmeıtin saýda úıinde mundaı jaǵdaıdyń bolýy tótenshe jaǵdaı mamandaryn qatty alańdatqan eken.
Al «Shyǵys Tańy» bazarynyń et satatyn bóliminde tońazytqyshtan aqaý shyǵyp, 12 sharshy metr aýmaq órtengen. Órtke taǵy da elektr qurylǵynyń durys jumys istemeýi sebep bolǵan.
Qala ákimi Reseıdiń Kemerovo qalasyndaǵy jaǵdaıdan sabaq alý kerektigin ataı kele, kásipkerlerdi óz menshigindegi keshenderdi erikti tekserýden ótkizýge shaqyrdy. Bul bastamany kásipkerler de biraýyzdan qoldady.
«Qalalyq tóteshe jaǵdaılar departamenti saýda jáne oıyn-saýyq ortalyqtaryn erikti túrde teksertý týraly ótinishter qabyldaı bastady. Kásipkerlik kodeksiniń 137 babyna sáıkes, mundaı tekserý kezinde kemshilikter anyqtalǵan jaǵdaıda ony joıý týraly usynys eskertpe ǵana aıtylady. Esesine órt qaýipsizdigi qanshalyqty saqtalatynyn ashyq kórýge bolady» - deıdi Aqylbek Muhaev.
Májiliste atalmysh nysandardyń kúzet qyzmetin jetildirý jaıy da sóz boldy.
