Óskemenniń ortalyq dańǵylynda sý tasqynynan kólik keptelisi paıda boldy
ÓSKEMEN. QazAqparat - Keshegi sý tasqyny Óskemen kóshelerinde kólik keptelisin týǵyzdy. Jaǵdaımen tanysqan oblystyń ákimi Danıal Ahmetov 1,5 saǵat ishinde kedergini joıýdy tapsyrdy, dep habarlaıdy QazAqparat tilshisi.
Sheshek asýynan aqqan qarǵyn sý Sátpaev dańǵylyn alyp, Jibek joly kóshesimen qıylysqan tusynda kólshik paıda bolǵan. Sonyń kesirinen kólik qozǵalysy qıyndap, keptelis týyndap, birneshe saǵatqa sozyldy. Oqıǵa basyna barǵan Danıal Ahmetov 1,5 saǵattyń ishinde keptelisti seıiltýge tapsyrma berdi. Ony uıymdastyrý qala ákimi Qýat Tumabaev pen oblys ákiminiń orynbasary Serik Aqtanovqa júkteldi. Aýa temperatýrasy mınýsqa túskenimen, kólkigen sý áli basylar emes. Kommýnaldyq qyzmet ókilderi sý jyrǵan oıyqtardy taspen biteýde.
«Keptelistiń kesirinen birneshe marshrýt kesteden keshigip jatyr. Basynda atalmysh qıylystan jeńil kólikterdi jibermeý usynylǵan. Qazir barlyǵy Sol jaǵalaý arqyly, aınalma jolmen qatynap jatyr. Áıteýir turǵyndardan shaǵym túsken joq. Olar da jaǵdaıdy kózimen kórip otyr ǵoı» - deıdi Óskemen qalasynyń jolaýshy tasymalyn basqarý ortalyǵy dırektorynyń orynbasary Ernar Mustafın.
Oblys ákimi qalalyq ákimdik ókilderin atalmysh qıylysta táýliktik kezekshilik uıymdastyrýǵa mindettedi.
