Óskemenniń irgesinen sırek metaldyń qory tabyldy
ÓSKEMEN. QazAqparat - Shyǵys Qazaqstannyń geologtary Óskemenniń shetindegi Ahmer aýylynyń aýmaǵynan lıtıı kenishin tapty. Bul týraly QazAqparat tilshisine ShQO óńiraralyq geologııa jáne jer qoınaýyn paıdalaný departamentiniń basshysy Serik Kelemanov aıtyp berdi.
Sońǵy úsh jylda Shyǵystyń mıneraldyq-shıkizat keshenin damytýǵa 5,5 mlrd teńge bólingen eken. Ol qarjyǵa keńes zamanynda tolyq barlanbaǵan aýmaqtar: Semeı qalasynyń mańaıy, Kúrshim, Abaı, Aıagóz aýdandary, Tarbaǵataı taý silemderi tyńǵylyqty zerttelipti. Bul barlaý jumystary Shyǵysta da qoınaýy tolyq zertttelmegen aýmaqtar kóp ekenin dáleldese kerek. Endi sol kenishterdiń qoryn naqtylap, ekonomıkalyq tıimdiligine kóz jetkizý úshin keshendi zertteýler júrgizilýi tıis. Ásirese Óskemenniń irgesindegi Ahmer kenishine geologtar úlken úmit artyp otyr. Lıtıı asa sırek kezdesetin, qoldaný aýqymy strategııalyq mańyzǵa ıe metall bolǵandyqtan, geologtar onyń boljamdy qoryn aıtýdan da bas tartyp otyr.
«Ádette lıtıı men qalaıy bir-birine ilesip júredi. Munda da solaı bop tur. Bizdiń mindet kenishti anyqtaý. Onyń ekonomıkalyq tıimdiligin ózge mamandar zertteýi tıis. Oblys boıynsha qalaıy men lıtıdiń kenishi Asýbulaq kenishter tobynyń keıbir bólikterinde ǵana kezdesedi. Sondyqtan Ahmer ýchaskesin ıgerýge nıetti ınvestorlar tabylady dep oılaımyz» - deıdi Serik Kelemanov.
Departament ókili Polına Skrebtsovanyń aıtýynsha, lıtıı metaly jylý únemdegish shynylardyń quramynda 31 paıyzǵa deıin, elektromobıl batareıalarynyń quramynda 23 paıyzǵa deıin kezdesedi. Oǵan keıbir ǵalymdar «bolashaqtyń munaıy» degen baǵa da berip úlgeripti. Quny ýrannan arzan bolǵandyqtan, ıadrolyq reaktsııalarǵa otyn retinde paıdalaný joldary zerttelip jatsa kerek. ıAǵnı, ýaqyt ótken saıyn lıtıge degen suranys ta arta bermek.
Jalpy Shyǵystyń geologııalyq kartasyna 283 jer qoınaýyn paıdalaný nysany tirkelgen.
Illıýstratsııalyq foto
