Óskemenniń hokkeıin kúsheıtý úshin kanadalyq mamandar shaqyrylady
ASTANA. QazAqparat - Kanadalyq mamandar endi qazaqstandyq hokkeıdiń ustahanasy sanalatyn Óskemen hokkeıiniń damýyna atsalyspaq. Bul jóninde oblys ákimi Danıal Ahmetovtyń Kanadanyń Qazaqstan Respýblıkasyndaǵy Tótenshe jáne ókiletti elshisi Shon Perrı Staıldy qabyldaýy barysynda aıtyldy. Bul týraly altaynews.kz habarlady.
Taraptar arasyndaǵy negizgi áńgime de eki eldiń arasyndaǵy sport salasyna, bizdegi hokkeı sportyn álemdik deńgeıde damytýǵa, ózara tájirıbe almasýǵa qatysty órbidi. Aımaq basshysy Danıal Ahmetov mártebeli meımannyń shaqyrtýymyzdy qabyl alyp, bizdiń óńirge kelýge ýaqyt tapqany úshin alǵysyn jetkizip, eki eldiń sport salasynda ortaq sharýa jeterlik ekenin atady.
« Óskemenniń «Torpedo» hokkeı klýby ótken maýsymda aıtarlyqtar jaqsy kórsetkishterge qol jetkizip, Reseı birinshiliginde top jardy. Degenmen, osymen toqtap qalmaımyz. Biz úshin qazir jas býyn ókilderin tárbıelep, shyǵarý asa mańyzdy. Sol úshin birinshi kezekte balalar bapkerlerin daıyndaımyz. Bul kezdesýdi Astanadaǵy kezdesýdiń jalǵasy deýge de bolady. Keleshekte bir topty tolyǵymen kanadalyq ádisteme arqyly daıyndaýǵa bolady. Sizderdiń mamandaryńyz osynda kelip, sheberlik synyptar ótkizse. Sondyqtan, eki jaqtyń sport salasynyń mamandary birlesip, Óskemendik hokkeıdi damytýdy qolǵa alamyz. Aımaqta hokkeıdi damytý úshin barlyq múmkindikter bar», - dedi Danıal Ahmetov.
Sonymen birge oblys basshysy alda óńirdiń birneshe qalalarynda hokkeı alańdary iske qosylatynyn da erekshe atap ótti. Sondaı-aq, óńirlik fýtboldy damytýǵa da kúsh salynyp jatqanyn, búginde «Real Madrıdtiń» enshiles kompanııasynan shaqyrtylǵan ıspandyq mamandar shyǵysqazaqstandyq jetkinshekterdi tárbıelep jatqandyǵyn jetkizdi. «Qazaqstanda Óskemendi hokkeıdiń qalasy, hokkeıdiń óńiri dep ataıdy eken. Bul biz úshin óte qýanyshty jaǵdaı. Aldymyzǵa Qazaqstandaǵy hokkeıdi damytýdy maqsat etip qoıyp otyrmyz. Osy maqsatta Astana qalasynda kezdesýler ótkizip, óskemendik hokkeıdiń bolashaǵyn talqyladyq. Hokkeıge ásirese, kóp balaly otbasylardyń, áleýmettik jaǵynan az qamtylǵan januıalardyń balalaryn tartý oıymyzda bar. Kelesi jyly Shyǵys Qazaqstanǵa 2-3 kanadalyq mamandy qysqa merzimge shaqyrýǵa bolady. Olar Kanadalyq hokkeıdiń ádisnamasymen bólisedi. Kelesi kezekte Kanadaǵa sizderdiń jattyqtyrýshylardy jiberip, tájirıbe almasýǵa bolady. Keshe hokkeıden jastar quramasynyń oıynyn kórdik. Alǵan áserimiz keremet», - dedi Kanadanyń Qazaqstan Respýblıkasyndaǵy Tótenshe jáne ókiletti elshisi Shon Perrı Staıl.
Kezdesýge qatysqan Kanadanyń aty ańyzǵa aınalǵan ardager hokkeıshisi, memlekettiń burynǵy Áleýmettik damý mınıstri Kennet Ýeın Draıden óz sózinde óskemendik hokkeıshilerdiń múmkindigin joǵary baǵalap, eki el arasynda sport salasyndaǵy baılanystardy nyǵaıta berý kerektigin atady.
