Óskemenniń avtobýs aıaldamasynda taǵy bir adam kóz jumdy
ÓSKEMEN. QazAqparat - Óskemende aıaldamada turǵan er adam kóz jumdy, dep habarlaıdy QazAqparat tilshisi.
Búgin tús mezgilinde «102» nómirine avtobýs aıaldamasynda er adamnyń jansyz jatqany týraly dabyl túsken. Oblystyq ishki ister departamentiniń habarlaýynsha, oqıǵa ornyna jetken Óskemen qalasynyń ishki ister basqarmasynyń jedel izdestirý toby marqumnyń aıaq astynan esten tanǵanyn anyqtaǵan.
Kezdeısoq kýágerler jedel járdem shaqyrǵanymen, 78 jastaǵy er adam kóp uzamaı kóz jumǵan. Oqıǵa Abaı dańǵylynyń boıynda ornalasqan «Temirlan» saýda úıiniń aldyndaǵy aıaldamada bolǵan.
«Alǵashqy málimetter boıynsha oqıǵadan qylmystyń izi baıqalmady. Qazir tekserý júrgizilip jatyr» - delingen departamenttiń málimetinde.
Eske sala keteıik, keshe Óskemenniń Ordjonıkıdze kóshesindegi aıaldamada 57 jastaǵy er adam kenet kóz jumǵan bolatyn.
