Óskemenniń áýejaıyn qalpyna keltirýge 5,2 mlrd teńge jumsalady
ÓSKEMEN. QazAqparat - Óskemen qalasynyń áýejaıyn qalpyna keltirýge 5,2 mlrd teńge jumsalady. Qazirgi ýaqytta qurylys jumystarynyń tehnıkalyq-ekonomıkalyq negizdemesin ázirleý jumystary aıaqtaldy, dep habarlaıdy QazAqparat altaynews.kz saıtyna silteme jasap.
Shyǵys Qazaqstan oblysy ortalyǵynyń áýejaıyn qalpyna keltirýge qarjy Eýrazııa qaıta qurý jáne damý bankiniń kredıttik transheıasy retinde bólinetin bolady. Jalpy soma - 5 mlrd 200 mln teńge.
Goszakup.gov.kz saıtyndaǵy málimetterge sáıkes, jobanyń tehnıkalyq-ekonomıkalyq negizdemesin ázirleýge oblystyq bıýdjetten 172 mln teńge bólindi.
QR Memlekettik satyp alýlar saıtynda ornalastyrylǵan aqparatqa súıensek, áýejaıdyń ushyp-qoný alańy 45 metrge deıin keńeıtilip, 288 metrge deıin uzartylady. Sondaı-aq júk termınaly men baqylaý-ótkizý pýnkti, eki órt sóndirý kóligine arnalǵan garaj, qoıma, transformatorlyq kishi stansyǵa qosalqy ǵımarat salynýy tıis.
Eske salaıyq, 2008 jyldyń jeltoqsan aıynan bastap Óskemenniń áýejaıy «Ertis» ÁKK» UK» AQ-ǵa tıesili.
«Ertis» ÁKK men EQDB arasynda Óskemenniń áýejaıyn jańǵyrtý boıynsha 5,2 mlrd teńgege aldyn ala kelisim jasaldy. Qazir áýejaıdyń qyzmeti úshin jańa tarıfterdi engizý máselesi sheshilýde. Bul aldaǵy ýaqytta nesıeni tóleýge múmkindik beredi. Árıne, ol tarıfterdi respýblıkalyq vedomstvolarmen kelisý qajet. Jumystar júrgizilýde», - dedi «ShQO-nyń Memlekettik-jekemenshik áriptestigi óńirlik ortalyǵy» AQ ınvestıtsııalyq jobalar departamentiniń bas sarapshysy ıÝrıı Halıtov.
