Óskemenniń áýejaıy tolyqtaı jańǵyrtylmaq
ASTANA. QazAqparat - Shyǵys Qazaqstannyń ákimshilik ortalyǵy áýejaıynyń ushý-qoný jolaǵy 2800 metrge deıin uzartylyp, 45 metrge deıin keńeıtilmek. Sonymen qatar, júk termınalyn, ýaqytsha saqtaý qoımasyn, apattyq-qutqarý stantsııasyn turǵyzý, belgi berýshi jaryq quraldaryn ornatý josparlanýda. Bul týraly ShQO ákimdiginiń baspasóz qyzmetinen habarlady.
Barlyq jumystardy júzege asyrý úshin 5,2 mlrd. teńge kóleminde qarjy tartylmaq. Onyń 1 mlrd. teńgesi Qazaqstan Respýblıkasynyń Úkimeti tarapynan, 2,5 mıllıardyn oblystyq bıýdjetten qarastyrylǵan. 1,5 mlrd teńge kólemindegi qarjyny Eýropalyq qaıta qurý jáne damý banki bermek.
ShQO men Eýropalyq qaıta qury jáne damý bankiniń basshylyǵy Óskemen qalasynyń áýejaıyn jańǵyrtýǵa baǵyttalǵan jobany júzege asyrý týraly aldyn ala kelisimge qol qoıdy.
«Áýejaıdy jańǵyrtý: júk termınalyn, ýaqytsha saqtaý qoımasyn, apattyq-qutqarý stantsııasyn turǵyzý, belgi berýshi jaryq quraldaryn jańartý esh kedergisiz barlyq halyqaralyq reısterdi qabyldaýǵa múmkindik beredi», - deıdi «Óskemen qalasynyń áýejaıy» AQ prezıdenti Nıkolaı Korolenko.
Jalpy, jóndeýden keıin áýejaıdyń ushý-qoný jolaǵy 300 metrge uzarady. Barlyq jumystar 2018 jyly bastalmaq. Qurylystyń normatıvti merzimi 22 aı.
Sonymen qatar, búgingi kúni Óskemenniń áýejaıynyń ǵımaratynyń janynan saǵatyna 200 adamǵa qyzmet kórsetetin jolaýshylar termınaly salynýda. Bul nysannyń qurylysy 2017 jyldyń ortasynda aıaqtalmaq.
Aıta ketsek, búgingi tańda oblys ákimdiginiń EQDB-men ınvestıtsııalyq qory 245 mlrd teńgeni quraıdy, onyń ishinde 43 mlrd teńgege aldyn ala jáne nesıelik kelisimderge qol qoıyldy.
