Óskemenniń atty polıtsııa vzvody joǵalǵan maldy ıesine qaıtardy
ÓSKEMEN. QazAqparat - 14 tamyzda Óskemen qalalyq Polıtsııa basqarmasynyń «102» nómirine qala turǵyny habarlasyp, aýlasynan 8 bas iri qara joǵalǵanyn jetkizgen, dep habarlaıdy QazAqparat tilshisi.
Jábirlenýshiniń aıtýynsha, 10 tamyz kúni kúıeýi maldy óriske shyǵarý úshin qoraǵa baryp, malynyń joqtyǵyn kórgen. Qoranyń esigi ashyq ári bos turypty. Óz kúshimen izdemek bolyp jan-jaqty qarastyrǵanmen joǵalǵan mal tabylmaǵan soń polıtsııaǵa habarlaýǵa týra kelgen.
«Qońyraýdy qabyldaǵan polıtsııa qyzmetkerleri birden qımyldap, jedel-izdestirý sharalaryn júrgizdi. Іzdestirý barysynda Óskemen qalalyq Polıtsııa basqarmasynyń patrýldik polıtsııa batalonyna qarasty atty vzvod qyzmetkerleri 5 kún boıy tabylmaǵan iri qaralardy taýyp, ıesine tabystady. Taýdan asyp jaıylǵan sıyrlar birshama alystap ketken bolyp shyqty», - dep habarlaıdy ShQO Polıtsııa departamentinen.
Shuǵyl izdestirý sharalaryna qylmystyq polıtsııa qyzmetkerleri de at salysqan. Taýly-ormandy, keı jerleri astyqty alqap bolǵandyqtan izdeý jumystary birshama qıyndyq týǵyzǵan kórinedi.
«Alaıda atqa mingen saqshylardyń qyraǵylyǵynyń arqasynda joǵalǵan mal aman-esen tabyldy», - deıdi Óskemen qalasy Polıtsııa basqarmasy patrýldik polıtsııa batalony kavalerııa vzvody komandıriniń orynbasary Ernar Adylhanov.
Eske sala ketsek, osy jyldyń sáýir aıynan bastap Óskemen qalasynda atty polıtsııa vzvody óz jumysyn bastaǵan. Olardyń negizgi mindeti - saıajaı aýmaǵynda, qala syrtynda bolatyn quqyq buzýshylyqtyń nemese qylmystyń aldyn alý.
