Óskemenniń ákimi qurylys alańynda kózboıaýshylyqqa kýá boldy
ÓSKEMEN. QazAqparat - Balabaqsha qurylysymen tanysýǵa barǵan Óskemen qalasynyń ákimi Jaqsylyq Omar kózboıaýshylyqtyń ústinen tústi, dep habarlaıdy QazAqparat tilshisi.
Senbi kúni qaladaǵy qurylys nysandaryna bas suqqan qala ákimi qurylysshylardyń jasandy áreketin áshkerelegen. Bul týraly ákimdiktiń áleýmettik jelidegi paraqshasynda jarııalandy.
Ótepov kóshesiniń boıynan oryn tebetin 250 oryndyq balabaqshanyń qurylysy ákimdiktiń erekshe nazarynda. Óıtkeni, nysan memlekettik-jekeshelik áriptestik aıasynda salynyp jatyr. Merdiger - «VK Tehnogrýpp» JShS. Ótken jyldyń naýryzynda bastalǵan qurylys jumystary bıyl tamyzǵa deıin bitýi kerek. Qurylys qarqynyn kórý úshin kelgen shahar basshysy nysan basyndaǵy on shaqty adamnyń kóz aldaý úshin ǵana júrgenin baıqap qalsa kerek. «Kirpish qalap jatqan» jumysshylarǵa jaqyndap kelgende qoldarynda kirpish arasyna jaǵatyn balshyq ta joq bolyp shyqqan.
«Jasandy áreketke jol bergen qurylys kompanııasyna jumysty shıratý júkteldi. Qala ákimi senbi-jeksenbige qaramaı, ashyq kúnniń bárin tıimdi paıdalaný kerektigin eskertti. Al qurylysshylar jumysqa qarqyn qosýǵa ýáde berdi. Budan bylaı nysan qalalyq qurylys basqarmasynyń jiti nazarynda bolady» - deıdi qala ákiminiń baspasóz hatshysy Álibek Túrsimbetov.
Áleýmettik jelilerden alynǵan skrınshot
