Óskemenge qys qaıta oraldy
ÓSKEMEN. KAZINFORM - Óskemende kóktemgi jyly aýa raıynan keıin jaǵdaı kúrt ózgerip, qalany qalyń qar basty.
Qar aralas jaýyn keshe kúndiz bastalǵanymen, tún ishinde kósheler men aýlalardy qalyńdyǵy 5 santımetrge deıin jetken qar japty. Tańerteń kóktaıǵaq paıda bolyp, jaǵdaıdy odan ári qıyndatty. Sonyń saldarynan joldarda keptelister týyndap, jol-kólik oqıǵalary kóbeıdi.
Júrgizýshilerdiń aıtýynsha, ásirese qaladaǵy keıbir aýdandarda ahýal kúrdeli.
— Jol óte taıǵaq, ásirese Jibek matalar kombınaty yqshamaýdanynda. Kólikter baıaý qozǵalyp jatyr. Kópshiligi jazǵy dóńgelekke aýysyp úlgergendikten, kólikti basqarý qıyn, - deıdi olar.
Sınoptıkterdiń málimetinshe, kún kúrt qubylýy óńir arqyly ótken tsıklonǵa baılanysty. Osyǵan oraı, oblysta aýa raıyna baılanysty eskertý jarııalandy.
- 17 sáýirde oblys aýmaǵynda jańbyr aralas qar jaýdy. Joldarda kóktaıǵaq saqtalady, keı aýdandarda tuman túsýi yqtımal. Jeldiń ekpini sekýndyna 15–20 metrge deıin jetedi. Tótenshe jaǵdaılar departamenti qolaısyz aýa raıy jol qozǵalysy qaýipsizdigine keri áser etýi múmkin ekenin eskertip, turǵyndarǵa múmkindiginshe eldi mekenderden tys saparlardy keıinge qaldyrýdy usynady, - dep eskertti qutqarýshylar.
Buǵan deıin Qaraǵandyny da sáýir aıyndaǵy qar basqany habarlanǵan.
