Óskemenge ákelinetin elektrobýstardyń baǵasy belgili boldy
ÓSKEMEN. QazAqparat - Óskemende elektrobýsty synaqtan ótkizip jatqan Higer Quazar kompanııasynyń ókilderi ekologııalyq kóliktiń boljaldy baǵasyn atady, dep habarlaıdy QazAqparat tilshisi.
Higer Quazar kompanııasy bas dırektorynyń orynbasary Roman Mırazımovtyń aıtýynsha, qazir synaqta júrgen elektrobýstyń uzyndyǵy 8 metr. Qala bıligi onyń qyzmetin unatsa, 12 metrlik úlgileri ákelinbek. Baǵasy - 280 myń dollar.
«Bul tehnıkalar eýrostandartqa túgeldeı saı. Aýa baptaǵysh, alasa baspaldaq, ekologııalyq qaptamalar sııaqty zamanaýı dúnıeniń barlyǵymen jabdyqtalǵan. Osyǵan sáıkes, baǵasy 280 myń dollar bolady. Eń qymbat bólshegi - tıtan men lıtıden quıylǵan batareıalary» - deıdi Roman Mırazımov.
Onyń aıtýynsha, qazir Óskemende júrgen elektrobýs byltyr EKSPO kórmesi kezinde Astana qonaqtaryn tasyǵan eken. Ótken bir jyldyń ishinde ol Máskeý, Astana, Almaty, Qaraǵandy jáne Jańaózen qalalarynda synaqtan ótipti. Qaraǵandy men Jańaózende qysty ótkizgen elektrobýs óziniń aıazǵa tózimdi ekenin dáleldep shyqsa kerek.
«Atalǵan qalalardyń birinde de bizdiń tehnıka syr bergen joq. Elimizde Astanadan basqa qalalardyń barlyǵynda qoǵamdyq kólik qyzmeti jeke bıznestiń qolynda bolǵandyqtan, ony turaqty marshrýttarǵa engizý múmkin bolmaı tur. Eger ózge qalalar da qoǵamdyq kólik qyzmetin basqaratyn mýnıtsıpaldy ortalyqtar ashsa, avtobýstar ekologııalyq tehnıkalarmen aýystyrylýy múmkin. Al jeke tasymaldaýshylar úshin baǵasy áldeqaıda arzan dızeldi avtobýstardy satyp alý tıimdi. Sondyqtan, jeke tasymaldaýshylardy jańashyldyqqa yntalandyrý úshin damý ınstıtýttary olarǵa tıimdi usynystar jasaýy kerek», - deıdi Higer Quazar kompanııasynyń ókili.
Shvetsııa tehnologııasymen jumys isteıtin Higer Quazar kompanııasy Almatyda qurastyrý tsehyn ashyp úlgergen eken. Óskemende júrgen 8 metrlik elektrobýs ta sol tsehtiń ónimi Óskemenge kelgennen beri atalmysh elektrobýstyń jol ústinde óship qalǵany týraly aqparat birneshe ret taraǵan bolatyn. Roman Mırazımov ondaı oqıǵa eski transformatordyń kerneýi kúrt kóterilýi saldarynan oryn alǵanyn atady. Elektrobýstyń Óskemendegi synaǵy endi bir aptadan keıin bitedi. Synaq sátti ótip, Higer Quazar kompanııasynyń usynysy maquldanǵan kúnniń ózinde elektrobýstardy qaladaǵy qaı tasymaldaýshy kompanııa satyp alatyny belgisiz.
Romannyń sózishe, bul elektrobýstar óz baǵasyn bes jyldyń ishinde aqtaıdy. Qala bıligi de elektrobýstar jappaı qoldanysqa engen kúnniń ózinde jol júrý baǵasy alǵashqy bes jylda qazirgi tarıf deńgeıinde qalatynyn aıtyp otyr.
