Óskemendikterdiń qoqys shyǵarý qyzmetine qaryzy 250 mln teńgege jýyqtady

ÓSKEMEN. KAZINFORM – Óskemen qalasynyń turǵyndary qatty turmystyq qaldyqtardy shyǵarý qyzmetine 247 mln teńge qaryz.

Halyqtyń barlyǵy birdeı qoqys shyǵaratyn kompanııamen qyzmet kórsetý jóninde kelisimshart jasamaǵan. Al kelisimsharty bar abonentterdiń ózi aqshany ýaqtyly tólemeıdi. Bul másele Qoǵamdyq keńes otyrysynda kóterildi.

Qalalyq TÚKSh, jolaýshy kóligi jáne avtomobıl joldary bólimi basshysynyń orynbasary Rashıd Sherýbaevtyń aıtýynsha, búginde Óskemende 372,7 myń adam turady. Alaıda qoqys shyǵarý qyzmetine nebári 224 myń abonentpen kelisimshart jasalǵan.

– Onyń ishinde 204,3 myńy – kópqabatty turǵyn úılerdiń, 19,7 myńy – jer úılerdiń turǵyndary. Kelisimshart jasaǵan abonentterdiń tek 80 paıyzy ǵana aqsha tólep otyr. Jalpy qaryz kólemi 247,1 mıllıon teńgege jetti, – dedi ol.

ıAǵnı, árbir besinshi abonent ózi paıdalanatyn qyzmet úshin aqy tólemeıdi. 

Mamandar úılerdi aralap, túbirtek taratyp, kelisimshart jasaý jáne aqshany ýaqtyly tóleý qajettigin túsindiredi. Alaıda kelisimsharty bar azamattardyń ózderi keı jaǵdaıda tólem jasaý qajettigin elemeıdi. Ásirese bereshektiń basym bóligi qyzmet turaqty túrde kórsetiletin kópqabatty úılerde qalyptasyp otyr.

Bereshek kólemi ulǵaıa berse, qoqysty ýaqtyly shyǵarý men arnaıy tehnıkany jańartý máselesi qıyndaıdy. Bul qalanyń sanıtarlyq qaýipsizdigine tikeleı áser etetin másele.

Eske salsaq, buǵan deıin Qyzylordadaǵy kóptegen qoqys polıgony talapqa saı emestigi habarlanǵan.