Óskemendikter lıftilerdiń jıi synatynyna shaǵymdandy
ÓSKEMEN. KAZINFORM — Shyǵys Qazaqstanda kópqabatty úılerdegi lıftterdiń úshten biri ábden tozǵan. Al jartysyna jýyǵynyń jumys istep turǵanyna 25 jyldan asyp ketti. Qaıta-qaıta synatyn lıftter ásirese joǵarǵy qabattarda turatyn zeınetkerlerge qorǵasyndaı aýyrtpalyq tıgizgen.
«Lıftiń istegeninen synǵany kóp»
Óskemende Anton Chehov kóshesindegi kópqabatty úıde turatyn zeınetker lıfttiń tym jıi isten shyǵatynyn aıtty.
— Bizdiń úı de, lıft te eski. Ózimniń osynda turyp jatqanyma 49 jyl boldy. Osy jarty ǵasyr ishinde lıft bir de bir ret almastyrylǵan joq. Tek trosy ǵana aýystyryldy. Sondyqtan aptasyna 2 ret synyp turady. Buzylǵan saıyn lıft jóndeıtinderdi óz qarajatymyzǵa shaqyramyz. Al sońǵy ýaqytta ylǵy óship qalyp júr. Segizinshi qabatta turatyn maǵan bul óte qıyn. Jasym bolsa 68-ge keldi, — deıdi Vasılıı Pavlov (óz suraýy boıynsha aty-jóni ózgertilip berildi).
Al Slavskıı kóshesindegi úıdiń 5-qabatynda turatyn Zeınep Maqsutova lıft synyp qalǵanda dalaǵa shyǵýdan qalatynyn jetkizdi.
— Onsyz da jasym kelgendikten júris-turysym qıyndady. Al baspaldaqpen kóterilip-túsý degen men úshin naǵyz beınet. Lıftiń istegeninen synǵany kóp, — deıdi jasy jetpisten asqan keıýana.
Turǵyndar óz qarajatyna jóndetýi tıis
Shyǵys Qazaqstandaǵy qalalar men aýdandar ákimdikteriniń aqparatyna sáıkes, óńir boıynsha 3700-den astam kópqabatty turǵyn úı bar. Ol úılerdegi lıft sany — 783. Óskemen qalasynda — 740, Rıdderde — 34, Altaı aýdanynda — 9 lıft jumys istep tur.
Onyń ishinde iske qosylǵanyna 25 jyldan asqan lıft sany — 380. Almastyrýdy qajet etetin — 284, jóndeýdi talap etetin — 98 lıft bar. Alaıda ShQO energetıka jáne TÚKSh basqarmasy eskirgen lıftterdi halyqtyń óz qarajatyna jóndeýi tıistigin málim etti.
— Turǵyn úı qatynastary týraly zańnyń 10-3 babyna sáıkes, respýblıkalyq mańyzy bar qalalardyń, astananyń, aýdandardyń, oblystyq mańyzy bar qalalardyń jergilikti atqarýshy organdary jergilikti bıýdjet qarajaty bolǵan kezde páter ıeleriniń aqshany qaıtarýyn qamtamasyz etý shartymen kóppáterli turǵyn úılerde lıftterdi jóndeýdi jáne aýystyrýdy uıymdastyrýdy jáne qarjylandyrýdy júzege asyrýǵa quqyly. Erejege qatysý úshin turǵyndar jınalys ótkizip, oń sheshim qabyldaýy qajet. Osydan keıin bólim mamandandyrylǵan ýákiletti uıymmen birlesip, ár kóppáterli turǵyn úıdiń, lıftterdiń tehnıkalyq jaı-kúıin tekserýdi, jumystardyń quramy men kólemin anyqtaýdy, turǵyn úıdi kúrdeli jóndeý jáne lıftterdi zań talaptaryna sáıkes aýystyrýdy iske asyrady. Al aǵymdaǵy jóndeý jumystaryn turǵyndar turaqty túrde óz qarajattaryna júrgizedi, — dep jaýap berdi basqarma basshynyń orynbasary Raýan Turysbek Kazinform tilshisiniń resmı saýalhatyna.
Demek, kópqabatty úıdegi bir podezd turǵyndary jınalys ótkizip, sonda lıftti aýystyrý-aýystyrmaýdy daýysqa salýy tıis.
Basym bóligi qoldasa onda oń sheshim shyqty degen sóz. Osy rette, qoldamaı daýys bergender de zań boıynsha aqsha jınaýǵa mindetti. Al lıfti aýystyrý shyǵyny shamamen 12-18 mln teńge aralyǵynda.
Eske salsaq, buǵan deıin Qazaqstanda taǵam, janarmaı, lıftige qatysty tehnıkalyq reglament qaıta qaralatynyn jazǵanbyz.