Óskemendikter emtıhan tapsyrýdaǵy uzyn-sonar kezektiń saldarynan júrgizýshi kýáligin ala almaı júr

ÓSKEMEN. KAZINFORM – Óskemen qalasynyń turǵyndary emtıhan tapsyrýdaǵy uzyn-sonar kezektiń saldarynan júrgizýshi kýáligin ala almaı áýre-sarsańǵa tústi. Qarasha aıynda emtıhanǵa kirýge múlde oryn joq. 

Avtomektepti bitirip, júrgizýshi kýáligin alý úshin mamandandyrylǵan HQO-ǵa kelgender emtıhan tapsyra almaı jatqanyna narazy.

«Portalda emtıhanǵa tirkelý múmkin emes. Qarasha aıyna bos oryn joq. Keıbireýler Semeı qalasyna baryp tapsyryp jatyr. Ol jaqta mundaǵydaı kezek joq eken. Biraq bári sol úshin kórshi oblysqa baryp júre almaıdy», - deıdi Botakóz esimdi qala turǵyny.

«Azamattarǵa arnalǵan úkimet» memlekettik korporatsııasy» KE AQ Shyǵys Qazaqstan oblysy boıynsha fılıaly baspasóz qyzmetiniń málimetinshe, emtıhan tapsyrý úshin portal arqyly aldyn ala jazylý qajet. Qazir rasymen de qarasha aıyna bos oryn joq.

«Júrgizýshi kýáligin alǵysy kelgen adam teorııalyq nemese praktıkalyq emtıhan tapsyratyn oryndy, kúndi jáne saǵatty portal arqyly tańdaıdy. Praktıkalyq emtıhandy tapsyrý úshin www.gov4c.kz saıtyna tirkelesiz. Qazirgi ýaqytta óskemendikter qarasha aıynda ótetin emtıhan ýaqyttaryna túgeldeı tirkelip qoıdy. Osy apta ishinde jeltoqsan aıyna tirkeý bastalady», - delingen aqparatta.

Eske salsaq, osyǵan deıin Óskemende júrgizýshi kýáligine emtıhan tapsyrǵandardan 40 mln teńge syıaqy alǵan HQO qyzmetkerleri sottalǵany habarlanǵan.