Óskemendikter Aıaz atanyń «týǵan kúnin» atap ótti
Shyǵys Qazaqstan oblysynda alǵash ret Aıaz atanyń rezıdentsııasy ashyldy, dep habarlaıdy Kazinform.
ShQO ákimi baspasóz qyzmetiniń málimetine súıensek, búgin Óskemende «Aıaz atanyń týǵan kúni» atty fentazı-qoıylym ótti. Qoıylymdy halyq ertegileriniń keıipkerleri Er-Tóstik pen Aqshaqar júrgizdi.
«Aıaz ata saltanatty rásimge ózimen birge saraıyn ártúrli dushpandar men jaýyzdardan kúni-túni qorǵaıtyn qazaq halyq ertegilerindegi batyrlardy erte keldi. Aıaz atany týǵan kúnimen quttyqtaýǵa basqa elder ertegileriniń keıipkerleri de kelip jetken. Merekege jınalǵan balalar Aıaz ata men Aqshaqardy, Santa Klaýs pen Laplandııa elfterin qol shapalaqtap qarsy aldy. Sodan keıin Aıaz atanyń qalalyq rezıdentsııasynyń saltanatty ashylýy ótti», - delingen aqparatta.
Uıymdastyrýshylardyń aıtýynsha, Aıaz atanyń úıi Katonqaraǵaı aýdanyndaǵy Korobıha aýylynda ornalasqan. Al Óskemendegi rezıdentsııasy Sol jaǵalaý saıabaǵynda ashyldy. Rezıdentsııanyń ishinde ystyq shaı, tátti-dámdi satatyn saýda oryndary, poshta, Aıaz atanyń jumys orny jáne ekinshi qabatynda onyń jatyn bólmesi bar.
Aıaz ata qonaqtarmen birge Respýblıka alańyna da bardy. Onda Shyǵys Qazaqstan oblysynyń bas shyrshasyn jaǵý rásimin ótkizip, balalarmen jańajyldyq shyrshany aınala qol ustasyp án shyrqap, bı bıledi.
