Óskemendik shendi polıtseılerdiń jemqorlyq áreketteri áshkere boldy

Óskemen qalalyq polıtsııa basqarmasy ákimshilik polıtsııa bóliminiń bastyǵy qamaýǵa alyndy. Bul týraly Sybaılas jemqorlyqqa qarsy is-qımyl agenttiginiń resmı ókili Arman Tileýkenov aıtty, dep habarlaıdy Kazinform.

«Shyǵys Qazaqstan oblysynyń sybaılas jemqorlyqqa qarsy qyzmeti UQK departamentimen ózara is-qımyl jasaı otyryp, jasyryn tergeý áreketteriniń nátıjesinde Óskemen qalalyq polıtsııa basqarmasy ákimshilik polıtsııa bóliminiń laýazymdy tulǵalary men basqa da adamdardyń jemqorlyq áreketterin áshkereledi. Mamandandyrylǵan turaqtardan avtokólik quraldaryn berý kezinde júıeli túrde para alý faktisimen ákimshilik polıtsııa bóliminiń bastyǵy sot sanktsııasymen qamaýǵa alyndy. Qazirgi ýaqytta sotqa deıingi tergeý aıaqtalý satysynda», - dedi Arman Tileýkenov vedomstvoda ótken brıfıngide.

Onyń atap ótýinshe, Qylmystyq-protsestik kodekstiń 201-babyna sáıkes, ózge aqparat jarııa etýge jatpaıdy.

«Konstıtýtsııanyń 77-baby 3-tarmaǵynyń 1-tarmaqshasyna jáne Qylmystyq-protsestik kodeksiniń 19-baby 1-bóligine sáıkes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árbir adam kinásiz dep esepteledi», - dedi ol.