Óskemendik kásipkerler PIK tarapynan qosymsha tólemder men shekteýlerge shaǵymdandy
ÓSKEMEN. KAZINFORM – Óskemen qalasynyń kásipkerleri páter ıeleri kooperatıvimen jáne basqa da basqarýshy kompanııalarmen ózara is-qımyl barysynda týyndaǵan qıyndyqtar týraly aıtyp shaǵymdandy. Olardyń qatarynda ınjenerlik kommýnıkatsııalarǵa qoljetimdilikti shekteý, qosymsha tólemder talap etý jáne kommertsııalyq nysandarǵa kólikpen kirýge kedergi keltirý máseleleri bar.
Bul týraly ShQO Kásipkerler palatasynyń kásipkerler quqyǵyn qorǵaý jáne sybaılas jemqorlyqqa qarsy is-qımyl jónindegi keńesi otyrysynda talqylandy.
Máseleniń biri «Al-Denta» JShS-ǵa qatysty. Klınıkanyń ınjenerlik kommýnıkatsııalary kórshiles kóppáterli turǵyn úıdiń jertólesi arqyly ótedi. Olardy qosý jobalyq qujattamada qarastyrylyp, nysandy paıdalanýǵa berý kezinde kelisilgen. Alaıda basqarýshy kompanııa jelilerge qoljetimdilikti shektegen.
Sýyq sýmen jabdyqtaý toqtatylǵannan keıin klınıka jumysyn jáne patsıentterdi qabyldaýdy toqtatýǵa májbúr bolǵan. Aqaýdy joıý úshin kelgen «Qazaqtelekom» mamandary da jertólege kire almaǵan. Sonyń saldarynan kásiporynda telefon baılanysy men ınternetke, kassalyq jabdyqtar men POS-termınaldardyń jumysyna qatysty keleńsizdikter týyndaǵan.
Sonymen qatar kásipker basqarýshy kompanııaǵa aı saıyn 20 myń teńge tóleýdi jalǵastyrǵan. Otyrysta usynylǵan málimetke sáıkes, shot-faktýralar men oryndalǵan jumystar aktilerin berý týraly ótinishter de qanaǵattandyrylmaǵan.
Taǵy bir kásipker dúkenge kirip-shyǵý máselesin kóterdi. Taýar jetkizý úshin júk kólikteri aýlanyń aýmaǵy arqyly ótýi qajet. Alaıda bul jol shlagbaýmmen shektelgen. Kásipker balama kireberis jolmen júrýge kelisýge tyrysqan, biraq 2026 jylǵy tamyzda qalalyq TÚKSh bólimi jaıaý júrginshiler alleıasyn abattandyrý josparlanyp otyrǵanyn aıtyp, ótinishten bas tartqan. Basqa kireberis jol qashan ashylatynyna qatysty naqty jaýap bermegen. Kásipkerdiń aıtýynsha, dúken bir jylǵa jýyq ýaqyttan beri jumys istemeıdi.
Jıyn barysynda tólemderdiń ashyqtyǵy jaıly da sóz etildi. Kásipkerler tarıfterdiń qandaı negizde belgilengenin, ony kim bekitkenin jáne kórsetilgen somalarǵa qandaı qyzmet túrleri kiretinin bilgisi kelip otyr. Olardyń aıtýynsha, bul tólemderdi rastaıtyn qujattardy alý da ońaı emes.
Memlekettik organdardyń jumysyna qatysty da suraq kóp. Kásipkerler TÚKSh bólimine júgingenimen, olarǵa prokýratýraǵa júginýge keńes berilgen. TÚKSh ókilderi muny PIK-tiń derbes uıym ekenimen jáne olardyń bólimge baǵynbaıtynymen túsindirgen.
Otyrysqa qatysýshylar PIK-tiń memlekettik organdarǵa tikeleı baǵynbaýy zańda kózdelgen baqylaý tetikteriniń joq ekenin bildirmeıtinin atap ótti. Negiz bolǵan jaǵdaıda PIK sheshimderiniń zańdylyǵy men onyń qyzmeti belgilengen tártippen tekserilýi múmkin.
- Másele jekelegen daýlardyń sheńberinen shyǵyp otyrǵanyn kórip otyrmyz. PIK-tiń ókilettigi qaı jerde aıaqtalatynyn, memlekettik baqylaýdyń qandaı tetikteri jumys isteıtinin jáne kásipkerlerdiń quqyqtary buzylǵan jaǵdaıda oǵan kim jaýap berýi kerektigin anyqtaý qajet, - dedi Kásipkerler quqyqtaryn qorǵaý jáne sybaılas jemqorlyqqa qarsy is-qımyl jónindegi keńestiń tóraǵasy Igor Shatskıı.
Jıyn qorytyndysy boıynsha keńes prokýratýradan PIK qyzmetin, olardyń ókilettikteri men memlekettik baqylaý tetikterin taldaýdy surady. Al TÚKSh bólimine kásipkerlerdiń shaǵymdaryn basqa mekemelerge baǵyttaýmen shektelmeı, olardy naqty qarastyryp, negiz bolǵan jaǵdaıda tekseris júrgizý usynyldy.
Eske salsaq, osyǵan deıin Almatyda MIB pen PIK qaryzdary kommýnaldyq tólem túbirteginde kórsetiletindigi habarlanǵan.
