Óskemendik áıel alaıaqtarǵa aqsha aýdaraıyn dep jatqan 79-daǵy ájeni toqtatty

ÓSKEMEN. KAZINFORM — Óskemen qalasynyń turǵyny zeınetkerdi alaıaqtardan qutqaryp, onyń 3 mln teńgeden astam qarajatyn saqtap qaldy. 

Oqıǵa qalanyń saýda ortalyqtarynyń birinde bolǵan. Anara Dobrovolskaıa jumystan qaıtar jolda dúkenge kirip, tólem termınalynyń janyndaǵy qart áıeldi kóredi.

Kózine jas alyp, qatty qobaljyp turǵan zeınetkerdiń aıaǵynyń astynda aqsha shashylyp jatqan. Ol qolynda qomaqty somany ustap, telefonmen sóılesip turdy.

— Áıel qart kisiden bári durys pa dep suraıdy. Belgili bolǵandaı, zeınetker «nemeresine» iri mólsherde aqsha aýdaryp jatqan eken. Ájeniń áreketi men telefondaǵy áńgimesi úlken kúmán týdyrǵan. Sol sátte Anara tutqany alyp, birneshe suraq qoıady. Er adam ózin Kırıll esimdi nemeresimin dep tanystyrǵanymen, zeınetker nemeresiniń esimi Aleksandr ekenin aıtqan. Bul qaıshylyq jeliniń ar jaǵynda alaıaqtar turǵanyn rastaǵan, — dep habarlady ShQO polıtsııa departamentinen.

Baılanys úzilip qalǵandaı keıip tanytqan Anara qarııany termınaldan alystatyp, polıtsııa shaqyrtqan. Keıinirek ol qaskóılerdiń zeınetkerge psıhologııalyq turǵydan qatty áser etkeni sonshalyq, polıtsııa qyzmetkerlerin kórgende ájeı úreılenip ketti. Sebebi oǵan bul áńgime týraly eshkimge tis jarmaý qatań eskertilgen eken.

— Keıin zeınetker polıtseılerge qońyraý shalǵan adam ózin UQK qyzmetkerimin dep tanystyryp, shottaǵy qarajatty urlaý áreketi jasalǵanyn habarlaǵanyn aıtyp bergen. Ol ájeni jınaqtaryn tez arada sheship alyp, «qaýipsiz shotqa» aýdarýǵa kóndirgen, — delingen aqparatta.

Shyǵys Qazaqstan oblysy polıtsııa departamentiniń basshylyǵy Anara Dobrovolskaıaǵa belsendi azamattyq ustanymy úshin alǵys bildirdi. 

Eske salsaq, osyǵan deıin Túrkistan oblysynda ınternet-alaıaqtarǵa urynǵandar 1,6 mlrd teńgesinen aıyrylǵany habarlanǵan.