Óskemendikterge robot ota jasaı bastady
ÓSKEMEN. QazAqparat - Óskemen qalalyq №1 aýrýhanada ota jasaıtyn robot synaqtan ótti. Sońǵy úlgidegi ota júıesin Italııadan arnaıy shaqyrylǵan professor Stefano Djıdaro iske qosty, dep habarlaıdy QazAqparat tilshisi.
Italııandyq mamannyń basqarýymen «otashy robot» 50 jastaǵy áıeldiń ót qabyn sylyp, alyp tastady. Stefano Djıdaroǵa byltyr Mılan qalasynda biliktiligin arttyrǵan Nartaı Týrahanov pen Rınat Muzdybaev assıstent boldy.
Oblystyq densaýlyq saqtaý basqarmasynyń basshysy Marat Shoranov atalmysh robottyń kómegimen kúnine 2-3 ota jasalatynyn aıtady. Sátti ótken otany oblys ákimi Danıal Ahmetov te syrttan baqylap turdy. Ol Shyǵys Qazaqstannyń aldaǵy 3 jylda medıtsına salasyndaǵy kóshbasshy óńirge aınalatynyn atap ótti.
Óńirde Robottandyrylǵan hırýrgııa jáne transplantologııa ortalyǵy Densaýlyq saqtaý mınıstrliginiń qoldaýymen ashylyp otyr.
«Bul ortalyqty ashýdaǵy basty maqsatymyz - emdeý jáne dıagnostıkalaý tásilderin jetildirip, ınnovatsııalyq tehnologııalar engizý. Barlyq jumys Almaty jáne Astana qalalaryndaǵy ulttyq ǵylymı ortalyqtardyń qatysýymen júzege asady» - deıdi Danıal Ahmetov.
Italııandyq mamannyń birneshe kúndik sapary barysynda jergilikti hırýrgtar baýyr jylaýyǵyn, ishki jaryqtardy jáne soqyr ishekti alyp tastaý, ót qabyn sylý sııaqty otalardy robotpen jasaýdy úırenbek. 
Jergilikti hırýrgtar ıtalııalyq kompanııa men basqarmanyń arasyndaǵy qondyrǵy jetkizý kelisimi aıasynda oqytylmaq. ıAǵnı, mamandardyń biliktiligin arttyrýǵa qosymsha shyǵyn ketpeıdi.
«Buǵan deıin atalmysh aýrýhananyń 4 mamany Mılanda 2 aptalyq kýrstan ótken bolatyn. Kelisimshart aıasynda taǵy 4 mamandy oqytý josparlanyp otyr» - deıdi oblystyq densaýlyq saqtaý basqarmasynyń basshysy Marat Shoranov.
Stefano Djıdaro robottandyrylǵan ota júıesin jasaýǵa ómiriniń 8 jylyn arnaǵan eken. Osy taqyrypta 12 ǵylymı eńbek jazypty. Sońǵy 2 jylyn Eýropa men Azııa elderiniń mamandaryna atalmysh tehnologııany úıretýge arnap keledi.
Hırýrgııalyq ota bóliminiń meńgerýshisi Sergeı Belyhtyń aıtýynsha, robot jumysynan aqaý shyqqan jaǵdaıda dáriger otaǵa tikeleı aralasa alady.
Atalmysh júıe jalpy hırýrgııa, ýrologııa, gınekologııa jáne keýde bóliginiń hırýrgııasy salalaryna arnalǵan. Aýrýhanada jyl aıaǵyna deıin búırek almastyrý otasyn jasaý josparlanǵan. Ortalyq oǵan qajet quraldarmen tolyqtaı jabdyqtalǵan. Sońǵy 2 jylda aýrýhanany tehnologııalyq turǵydan jetildirý úshin bıýdjetten 3,7 mlrd teńge bólingen.
