Óskemendikterge kene túse bastady
ÓSKEMEN. QazAqparat - Shyǵys Qazaqstanda keneler bas kótere bastady. Óskemendik turǵyn denesine qadalǵan keneni alǵyzý úshin dárigerge júgingen, dep habarlaıdy QazAqparat tilshisi.
Qoǵamdyq densaýlyq saqtaý departamentiniń mamandary óńirde kóktemniń jaı shyǵýyna baılanysty kenelerdiń belsendiligin de shegergenin aıtyp otyr.
«Kóp jylǵy monıtorıngterge súıene otyryp, kenelerdiń shabýyly sáýirdiń ekinshi onkúndiginde jandanatynyn boljaýǵa bolady. Al mamyr aıynyń basynda olardyń sany da artyp, naǵyz belsendi áreketke kóshedi. Onymen kúresýdiń eń tıimdi joly kene taralatyn aýmaqtarǵa dári sebý. Bul maqsatqa bıyl 13,018 mln teńge bólingen» - deıdi departament basshysynyń orynbasary Gúláıim Taǵaeva.
Bul qarjyǵa departament mamandary kóktem jáne kúz mezgilderinde kene taralatyn aýmaqtarǵa dári sebetin bolady. Qar erip bitisimen kóktemgi jumystar júrgizilýi tıis. Maman kene shaqqan jaǵdaıda ózdiginen áreket etpeı, 3 kúnniń ishinde dárigerge qaralý kerektigin eskertedi. Kene entsefalıtine qarsy ekpe ýly jándiktiń «shabýylyna» ushyraǵan adamdarǵa tegin jasalady.
Óskemende emdik sarysýdyń kómegimen kene shabýylynan saqtandyrý sharalary eresekter úshin №1 qalalyq aýrýhanada, balalar úshin Ana men bala ortalyǵynda júrgiziledi. Atalmysh aýrýhanalardyń travmatologııa beketteri táýlik boıy, ári mereke kúnderi de isteıdi. Al qadalǵan keneni alǵannan keıin, entsefalıtke tekserilý úshin Ulttyq saraptama ortalyǵynyń zerthanasyna júginý qajet.
Foto: www.vkocke.sk
