Óskemendikterdiń atynan nesıege taýar alyp, ony satýdan 22 mln teńge paıda tapqan alaıaq ustaldy

ÓSKEMEN. QazAqparat – Óskemen turǵyndarynyń atyna taýarlyq nesıe rásimdep, 22 mln teńge paıda tapqan alaıaq ustaldy, dep habarlaıdy QazAqparat tilshisi.

ShQO Polıtsııa departamenti baspasóz qyzmetiniń málimetine súıensek, tanystaryn áńgimege tartqan 23 jastaǵy er adam olardyń atyna nesıe rásimdep, aı saıynǵy bereshekti ýaqtyly tólep otyratyndyǵyn ýáde etken. Sodan keıin turmystyq tehnıka saýdalaıtyn dúkenderden nesıege taýar alady da, ony satyp, túsken aqshany qaltaǵa basqan.

«Alǵashqy aılarda ol nesıelerdi shynymen ótep júrdi. Biraq, keıin barlyq zardap shekkenderge merzimi ótip ketken nesıe týraly qońyraý túse bastady. Tártip saqshylary kúdiktini qolǵa túsirdi. Tergeý barysynda belgili bolǵandaı, alaıaqtyń arbaýyna 28 adam ilikken», - delingen aqparatta.

Jábirlenýshilerge keltirilgen materıaldyq zalaldyń jalpy somasy – shamamen 22 mıllıon teńge. Qazirgi ýaqytta QR Qylmystyq Kodeksiniń 190-baby 1-bóligine (Alaıaqtyq) sáıkes sotqa deıingi tergeý amaldary júrgizilip jatyr.