Óskemendikterdi shýlatqan qasqyr ma ıt pe
Óskemen. QazAqparat - Óskemen qalasynyń Kókjal Baraq kóshesin kók bóri kezip júr degen aqparat áleýmettik jelide ájeptáýir tolqý týǵyzdy. Bul aqparattyń anyq-qanyǵyna jetý úshin qalalyq veterınarııa bóliminiń mamandary shahardyń shetki aýmaqtaryna arnaıy reıd júrgizbekshi, dep habarlaıdy QazAqparat tilshisi.
Jurttyń áńgimesine sensek, «qoqys qoparǵan qasqyrlardy» eń birinshi osy mańdaǵy qurylysshylar baıqapty. Keıin ata-analardyń «WatsApp» toptaryn qasqyrǵa uqsas janýardyń sýreti qaptaıdy. Bul aqparatty belsendi «Feısbýk» qoldanýshylary áleýmettik jelilerge taratyp, keıinnen bul ákimdiktiń aralasýyna túrtki bolǵan.
«Joldasym túni boıy taksıletip, tańǵy tórt kezinde úıge qaıtqan kezinde bókterden qasqyrǵa uqsas janýarlardy kóripti. Qasynda bóltirigi bolǵan eken. Kóligimen jaqyndap barypty. Álgiler ne boı tasalamaǵan, ne aıbat ta shekpegen. Telefonnyń qýaty taýsylǵandyqtan sýretke túsire almapty. Tańerteń osy oqıǵany maǵan aıtqanda qurylysshylardyń áńgimesi beker emes-aý degen oı keldi. Sondyqtan ata-analar tobyna kúıeýimniń kórgenderin jazǵanmyn. Ondaǵy oıym tańǵy jetiden bastap balalaryn mektepke jiberetin adamdardy saqtandyrý edi. Qarańǵy seıilmeı turyp balalardy qaraýsyz jiberýge bolmaıdy. Qasqyr bolmaǵan kúnniń ózinde qoqys aqtaryp kúneltetin qańǵybas ıtter kóp bul aýdanda, - deıdi Móldir Baqtııarqyzy.
Móldir áleýmettik jelide taraǵan «qasqyrdyń» sýretin aýyldaǵy týysqanyna jibergen eken. Ol kisi sýrettegi janýardyń qasqyr emes ekenin, qasqyrdyń artqy aıaǵy aldyńǵysynan qysqa bolatynyn aıtyp, kóńilin jaılandyrypty. Eldiń záresin alǵan taǵynyń qasyna bóltirik ertip júrgenine de sený qıyn.
«Bórisyrǵaq» amalynyń 17-23 aqpanǵa dóp keletinin, odan keıin qurtqanyń keminde eki aı qursaq kóteretinin aýylda ósken qazaqtyń bári biledi.
Sýrette qoqys aqtaryp júrgen janýardyń qasqyr emes ekenin veterınar mamandar da rastap otyr. Ony jergilikti ózin-ózi basqarý komıtetiniń ókilderi «Dostyq» bazarynyń mańaıynan da kórip, sýretke túsirip alypty. Veterınarlar endi ıttiń ıesi bar-joǵyn anyqtaýy tıis.
«Bıyl qys túz taǵylaryna da aýyr tıip otyr. Qasqyrlar qatty ashyqqanda eldi mekendi torýyldaýy múmkin. El shýlap ketken soń jumys tobyn quryp, reıd júrgizgenbiz. Qasqyr kóripti degen turǵyndarmen sóılestik. Bizdiń kózimizge eshqandaı qasqyr shalynbady. Osy jaıtty túbegeıli anyqtaý úshin shetki aýmaqtardy aralap shyǵamyz. Naqty málimet sol kezde belgili bolady, - deıdi qalalyq aýyl sharýashylyǵy jáne veterınarııa bóliminiń basshysy Serik Kúdebaev.
Áleýmettik jeli qoldanýshylardyń arasynda ashyqqan qasqyrlarǵa tikushaqtan azyq tastaýdy usynǵandar da tabyldy. Aıtpaqshy, osy shýdyń arqasynda №19 shaǵyn aýdanda qaraýsyz qańǵyp júrgen ıtterdiń máselesine jergilikti ákimdiktiń nazary aýdy.
«Iesiz ıtterdi aýlaý keste boıynsha úzdiksiz júrip jatyr. Eki kún buryn ǵana osy №19 shaǵyn aýdannan 20 ıt aýladyq. Búgin de jaýapty organ ókilderiniń basyn qosyp konsılıým ótkizbekpiz. Sonyń sheshimimen qalanyń shetindegi kólik jetetin aýmaqtyń bárine reıd jasaımyz, - deıdi Serik Kúdebaev.
