Óskemendikter V Azııa oıyndarynyń jeńimpazy Aıbek Nuǵymarovty qarsy aldy
ÓSKEMEN. QazAqparat - Astanada ótken «Álem Barysy-2017» týrnıriniń jeńimpazy Aıbek Nuǵymarovty qarsy alý úshin Óskemen áýejaıyna qalyń jurt jınaldy, dep habarlaıdy «QazAqparat» HAA tilshisi.
Qazaq kúresinen ótken «Álem Barysy-2017» álemdik týrnırinde jeńiske jetip, Ashhabadta jaýyngerlik óner túrleri boıynsha jabyq ǵımarattaǵy V Azııa oıyndarynda altyn medal ıelengen Aıbek shyǵysqazaqstandyqtardyń maqtanyshyna aınaldy.
Aıbek Nuǵymarov - túıe balýan jáne qazaq kúresiniń sheberi, aýyr salmaqta halyqaralyq deńgeıdegi sport sheberi, qazaq kúresinen Qazaqstan chempıony. Ol Abaı aýdanynyń Qundyzdy aýylynda dúnıege kelgen. Qazaq kúresinen eki dúrkin álem chempıony (2008, 2010), Azııa chempıony (2008), Álem Kýbogynyń ıegeri (2011), sporttyń osy túrinen ótken kóptegen chempıonattardyń júldegeri, jeńimpazy. Sondaı-aq sambo boıynsha Qazaqstan Respýblıkasynyń chempıony (2012), «Qazaqstan Barysy» týrnıriniń jeńimpazy (2013), qazaq kúresinen álemniń absolıýttik chempıony (2017).
Aıbek «Álem barysy-2017» týrnırinde dzıýdodan Eýropa chempıony grýzın sportshysy Gýram Týshıshvılıdi merziminen buryn tize búktirip, jeńiske jetse, V Azııa oıyndarynda qyrǵyzstandyq Tilek Qýalovtan basym túsip, qurama qorjynyna óziniń altyn úlesin qosty.
