Óskemendikter tájik-aýǵan soǵysynyń qurbandaryn eske aldy
ÓSKEMEN. QazAqparat - 7 sáýir - Qazaqstan boıynsha tájik-aýǵan shekarasyndaǵy qaqtyǵysta qaza bolǵan qazaq áskerlerin eske alý kúni. Óskemende atalmysh kúnge baılanysty eske alý sharasy ótti, dep habarlaıdy QazAqparat tilshisi.
1995 jyly, dál osy kúni Peshevar shatqalyndaǵy Pıandj ózeniniń jaǵasynda Qazaqstannan barǵan jetinshi rota modjahedterdiń shabýylyna ushyraıdy. Atys saldarynan 17 sarbaz qaza taýyp, ondaǵan adam jaralanǵan. Adam shyǵyny bolǵanymen, tutqıyldan bastalǵan shabylýydyń beti qaıtarylǵan bolatyn. Oqqa ushqan bozdaqtar arasynda Shyǵys Qazaqstannyń týmalary da bar.
«Shyǵys» óńirlik qolbasshylyǵynyń №5518 jaýyngerlik bólimi ótkizgen eske alý sharasy 1 mınýt únsizdikten bastaldy.
«6 jyldan astam ýaqyt boıy Qazaqstannan barǵan 24 batalon TMD elderiniń shekarasyn kúzetip, Tájikstannyń táýelsizdigin saqtaýǵa kómektesken bolatyn. 1993-1999 jyldar aralyǵynda 2 myńnan astam ásker men ofıtser bitimgerlik maqsatpen tájik-aýǵan shekarasynyń boıynda boryshyn ótedi. Bozdaqtardyń erligi esimizde máńgi qalady» - dedi «Shyǵys» óńirlik qolbasshylyǵynyń qolbasshysy, general-maıor Talapker Ámrıev.
Eske alý sharasynda atalmysh maıdan alańynda bolǵan Ermek Satylǵanov, Dinıslam Shákirtov, Ámirjan Shalabaevtarǵa qurmet kórsetildi.
«Arada shırek ǵasyrdan astam ýaqyt ótkendikten, qupııa bolǵan kóp jaıttyń beti ashylyp jatyr. Sol materıaldardan bizdiń sarbazdar Vetnam, Kambodja, Chehoslovakııa, Vengrııa, Sırııa elderinde áskerı áreketterge qatysqanyn bilip jatyrmyz. Sol áskerı qyzmetkerler búgin el aldyna shyǵyp, qurmetke bólenýi kerek. 4 jyl boıy ózime senip tapsyrylǵan jaýyngerlerdiń basyn qaýipke tikpeı, úılerine aman oralýyna atsalysqanym úshin qazir qýanam. Olardyń ata-analarynyń aldynda arym taza ekenin sezinýdiń ózi zor maqtanysh» - deıdi óńirlik qolbasshylyqqa qarasty ardagerler keńesiniń tóraǵasy Aıdar Orazbaev.
