Óskemendikter kóbine qandaı syrqattarǵa shaldyǵatyny anyqtaldy
ÓSKEMEN. QazAqparat - Óskemen qalasynyń Qoǵamdyq densaýlyq saqtaý basqarmasy júrgizgen taldaýlar sońǵy 4 jylda turǵyndar arasynda aýrýshańdyqtyń artqanyn anyqtaǵan, dep habarlaıdy QazAqparat tilshisi.
Quzyrly organ oblys ortalyǵyndaǵy 11 medıtsınalyq mekemeniń derekterine súıene otyryp, aýrýshańdyqtyń sebep-saldaryna taldaý jasaǵan. Taldaý nátıjesinde 2013-2017 jyldar aralyǵynda halyqtyń arýshańdyǵy 4,5 paıyzǵa óskeni belgili boldy. 2013 jyly 100 myń adamnyń 814-i naýqasqa shaldyqsa, 2017 jyly bul kórsetkish 852 adamǵa jetken.
Jalpy, aýrýshańdyq kelesi syrqat túrleri boıynsha: as qorytý organdarynyń aýrýlary 43,7 paıyzǵa, zár shyǵarý organdarynyń aýrýlary 29,4 paıyzǵa, teri jáne terasty aýrýlary 24 paıyzǵa, endrokrındik júıe aýrýlary 18,9 paıyzǵa, qan jáne qan túzý organdarynyń aýrýlary 14,5 paıyzǵa, qanaınalym organdarynyń aýrýlary 12,5 paıyzǵa, tynys alý organdarynyń aýrýy 7,7 paıyzǵa óskeni baıqalǵan.
«Onkologııalyq aýrýlar eleýsiz mólsherde azaıǵan. Biraq ekologııanyń lastanýy men aýrýshańdyqtyń ósýi arasyndaǵy baılanysty anyqtaıtyn utymdy metodıka joq. 14 jyldan beri KSRO kezinen qalǵan tásil boıynsha taldaý jasap kelemiz. Jaǵdaı anyq kórinýi úshin aýrýǵa shaldyqqan adamdardy jasy men jynysyna, aýrý baıqalǵan mezgilge jáne basqa da kóptegen faktorlarǵa jiktep taldaý qajet. Óskemen qalasynyń Qoǵamdyq densaýlyq saqtaý basqarmasy osyndaı ádisnama bekitý qajettigi týraly Densaýlyq saqtaý mınıstrligine hat daıyndap jatyr» - deıdi oblystyq Ekologııalyq qaýipsizdik ortalyǵynyń dırektory Gennadıı Koreshkov.
