Óskemendik jýrnalıster mergendikten synǵa tústi
ÓSKEMEN. QazAqparat - Shyǵys Qazaqstandaǵy óńirlik «ALTAI» telearnasynyń 60 jyldyǵyna oraı BAQ ókilderi arasynda peıntbol, sadaq atý jáne nysana kózdeýden komandalyq týrnır ótti, dep habarlaıdy QazAqparat tilshisi.
Jarysqa aqparat salasyna qatysy bar mekemelerden quralǵan 6 komanda qatysty. «Shyǵys aqparat» JShS, S.Amanjolov atyndaǵy ShQMÝ, «ALTAI» arnasy, «Qaztsınk jarshysy» gazetiniń ujymdary men baspasóz hatshylardan quralǵan komandalar peıntbol alańynda qarsylastaryn jerebe arqyly anyqtasa, qalǵan kezeńderde jekeleı qol jetkizgen nátıjelerin ortaq upaıǵa saldy. Tartysqa toly týrnırde S.Amanjolov atyndaǵy ShQMÝ quramasy top jardy. Baspasóz hatshylar ekinshi oryn ıelense, «Qaztsınk jarshysy» gazeti úshinshi orynnan kórindi.
«Arnamyzdyń 60 jyldyq mereıtoıy qarsańynda birneshe shara josparlanǵan. Búgingi týrnır sonyń bir parasy ǵana. Saıysqa 50-den astam úmitker qatysty. Mereıtoı qarsańynda ardagerlerimizdi ardaqtap qana qoımaı, jastarǵa da tartymdy shara uıymdastyrýdy kózdedik. Týrnır áriptesterimizdiń kóńilinen shyqqan sııaqty. Eń bastysy, ózara baılanysymyz nyǵaıa túsedi degen oıdamyn. 16 mamyrda áskerı jattyǵý alańynda jýrnalısterdiń tikeleı qatysýymen áskerı-patrıottyq shara ótedi. Al 18 mamyrǵa 500 adamdy qamtıtyn is-sharalar kesheni josparlanǵan. Sonyń aıasynda Nurtileý Imanǵalı, Keńes Ádenov sııaqty televışııa salasynyń saıypqyrandaryn shaqyryp, bolashaq jýrnalısterge dáris oqytamyz» - deıdi «ALTAI» telearnasy dırektorynyń orynbasary Aıdos Juqanuly.
