Óskemendik júrgizýshi sýǵa ketken áıel men balany qutqaryp qaldy
ÓSKEMEN. QazAqparat - Óskemen qalasynyń №2 órt sóndirý bóliminiń júrgizýshisi eki jasar bala men anasyn Ertis ózenine aǵyp bara jatqan jerinen qutqaryp qaldy, dep habarlaıdy QazAqparat tilshisi.
Oqıǵa búgin túski saǵat 12.00-der shamasynda bolǵan. Slavskıı jaǵalaýynda alańsyz serýendep júrgen bala abaısyzda Ertis ózenine qulaǵan. Balasyn qutqarý úshin anasy da sýǵa sekirgen. Oqys oqıǵa órt sóndirý kóliginiń júrgizýshisi Vıtalıı Baqtybaevtyń kóz aldynda bolǵan.
«Ol esh oılanbastan sýǵa ketken ana men balanyń sońynan sekiredi. Kómekke taǵy 2 adam umtylǵan. Olar sol mańda elektr baǵanyn jóndep júrgen Aıdyn Tórtbaı men Ernar Qadybekov ekeni anyqtaldy. Ernar Qadylbekov balany sýdan shyǵarǵan boıda durys sheshim qabyldap, jasandy tynys berý arqyly aman alyp qalǵan» - delingen Tótenshe jaǵdaılar komıteti taratqan aqparatta.
Úsh jigit sýda arpalysyp jatqanda jaǵaǵa tótenshe jaǵdaı departamentiniń ókilderi Alekseı Ogradov, Aqylbek Muhaev, Erjan Qasymhanov jáne Erik Toıbaev kelip jetken. Olar sýǵa batqan bala men áıeldiń jaǵaǵa aman-esen shyǵarýǵa kómektesken.
