Óskemendik jazýshy Borıs Şerbakov Abaıdyń týǵan jeri týraly kitap jazdy
ASTANA. QazAqparat - Shyǵys Qazaqstan oblystyq Pýshkın atyndaǵy kitaphanada óskemendik jazýshy ári ólketanýshy Borıs Şerbakovtyń «Jıdebaıdyń juldyzdy dalasy» - «Zvezdnaıa step Jıdebaıa» atty kitaby jaryqqa shyqty. Ólketanýshynyń tyń týyndysy qazaq jáne orys tilinde oqyrmanǵa jol tartty, dep habarlaıdy «QazAqparat» HAA tilshisi.
Ólketanýshy kitapty jazý úshin Abaı aýdanyndaǵy uly aqynnyń týǵan jerin aralap, «Abaı-Shákárim» memorıaldyq keshenin birneshe jyl boıy zerttegen. Qazaqtyń uly tulǵasy dúnıege kelgen meken Eýrazııa keńistiginiń týra ortasy - kindik núktesi ekeni belgili. Jas kezinen Shyǵystyń shyraıly mekenin armansyz aralaǵan Borıs Şerbakovtyń týyndysynyń tusaýkeserine birqatar zııaly qaýym ókilderi qatysty.
Borıs Şerbakovty jerlesteri bıologııa ǵylymdarynyń doktory, Qazaqstan Respýblıkasynyń Jazýshylar odaǵynyń múshesi, Shyǵys Qazaqstan oblysy ákiminiń arnaıy syılyǵynyń laýreaty, bilgir ornıtolog retinde tanıdy. Kitap jazýmen birge ornıtolog óńirdiń ań-qustarynyń ahýaly máselesin jıi kóterip, qoǵamdyq jumystarǵa belsene aralasyp júr.
«Osy týyndyny jazýda kóp eńbektendim. Nelikten Abaı týraly jazýdy uıǵardym?.. Uly aqynnyń ulylyǵyn sózben jetkizý múmkin emes. Sol sebepti, Abaıdyń júrip ótken joldaryn, onyń ólmes týyndy jazǵan óńirdiń qasıetin oqyrmanǵa sezdire bilýge tyrystym», - deıdi Borıs Şerbakov.
Avtor óz kitabynda jalǵyz aqynnyń ǵana ómirine toqtalyp qalmaı, qazaq atyn álemge pash etken, osy óńirdiń týmalary týraly da jazyp ótken. Kitaptyń ár taraýy Abaı Qunanbaıulynyń ómiri týraly keremet syr shertip, Jıdabaı óńiriniń qasıetti meken ekenin pash ete túsedi.
«Borıs Şerbakov Abaı týraly týyndy jaza otyryp, Uly aqynnyń ómirin zertteýde tyńǵa túren sala bildi. Óz basym jazýshynyń Abaı jaıly kitap jazýǵa jyldar boıy oqtalyp júrgenin biletin edim. Uly dalaǵa degen sheksiz mahabbat jazýshyny osy týyndyny dúnıege ákelýge jeteledi»,- deıdi bıblıograf Janna Saqpanova.
