Óskemendik saqshylar 8 qabattan sekirmek bolǵan jigitti toqtatty
Oqıǵa 9 naýryz kúni bolǵan. Kúndizgi saǵat 15.30 shamasynda «102» arnasyna áıel adam habarlasyp, beıtanys jigittiń terezeden sekirmek bolyp jatqanyn habarlaıdy. Oqıǵa ornyna dereý jetken tergeýshi Saǵynysh Sábıhanov pen jedel ýákil Qanat Dáýithanov páterdiń nómirin birden anyqtap, segizinshi qabatqa júgirgen.
Bul kezde tótenshe jaǵdaı, jedel járdem mamandary da jetip úlgeredi. Páterge kirgen boıda saqshylar jigittiń terezeden syrtqa shyǵyp alǵanyn baıqaıdy. Ómir men ólimniń arasyn bir ǵana qadam bólip turǵan. Tómendegi adamdardyń aqyly men jalynyshty sózderine 24 jastaǵy jigit qulaq asa qoımaıdy. Tek Saǵynysh Sábıhanovpen tildese bastaıdy. Osy sátti paıdalanyp, tergeýshi jyly sózdermen jigitti ózine baýraı bergen. Kelissóz bir saǵatqa jýyq ýaqytqa sozylǵan. Aqyry Saǵynysh Sábıhanovtyń aǵalyq aqylyna ılikken jigit alǵashqy raıynan qaıtqan.
«Jas-jas jigittiń nelikten mundaı sheshim qabyldaǵanyn tergeý amaldary anyqtaıdy. Ázirge sebebi belgisiz. Sonshama adamnyń arasynan tergeýshiniń sózi ǵana áser etse kerek. Óz isin adal atqaryp, adam ómirine arasha túskeni úshin Saǵynysh Sábıhanovty marapattaý jóninde basshylyqqa usynym jiberildi. Al sýıtsıd jasamaq bolǵan jigit din aman», - deıdi oblystyq polıtsııa departamentiniń memlekettik til jáne aqparat basqarmasynyń basshysy Áıgerim Nurǵazına.