Óskemendik polıtseıler sýıtsıdtiń aldyn aldy
ÓSKEMEN. QazAqparat – Óskemen qalasynda polıtsııa qyzmetkerleri sýıtsıdtiń aldyn aldy, dep habarlaıdy QazAqparat tilshisi.
Qalalyq polıtsııa basqarmasy baspasóz qyzmetiniń málimetine súıensek, keshe saǵat 21.35 shamasynda Nazarbaev dańǵylyn patrýldep júrgen polıtsııa qyzmetkerlerine er adam júgingen.
Ol turǵyn úıdiń aýlasynda belgisiz bireýdiń óz-ózine qol jumsaý úshin tamaǵyna pyshaq tósep turǵanyn jetkizdi.
«Tártip saqshylary shuǵyl túrde sol jerge kelip jetip, qolynda pyshaǵy bar 30 jastaǵy erkekti kórdi. Ol sýıtsıd jasaıyn dep turǵan. Polıtseıler er adamdy áńgimege tartýǵa tyrysty. Sol ýaqytta ShQO TJD-nyń psıhology Svetlana Andrýsenko kómekke kelip, jigitti sózge aınaldyrdy. Yńǵaıly sát týǵanda polıtsııa qyzmetkerleri jedel áreket etip, turǵynnyń qolyndaǵy pyshaqty alyp alǵan», – deıdi basqarma bastyǵy Andreı Mýla.
Qazirgi ýaqytta er adamdy osyndaı qadamǵa neniń ıtermelegeni anyqtalýda.
Onymen psıhologtar jumys istep jatyr.
