Óskemendik polıtseıler sýda aǵyp bara jatqan jigitti qutqardy
ÓSKEMEN. QazAqparat – Óskemen qalasynyń polıtsııa qyzmetkerleri sýda aǵyp bara jatqan jigitti qutqaryp qaldy, dep habarlaıdy QazAqparat tilshisi.
Qańtardyń 11-inde túngi saǵat 23.40-ta «102» arnasyna er adamnyń Ponton kópirinen sekirmekshi bolyp turǵandyǵy týraly habar túsken. 2 mınýttyń ishinde oqıǵa ornyna polıtsııa leıtenanty Meıirhan Raqyshev pen polıtsııa kishi leıtenanty Baýyrjan Rızabekov jetti. Olar kópirdiń qorshaýynan bir qolymen ustap, ózenge sekirgeli turǵan er adamdy kórgen.
«Tártip saqshylary ony ustap qalýǵa tyrysqanymen jigit kópirden ózenge qulaıdy. Polıtseıler sýdyń aǵyny jigitti tómen qaraı alyp ketkendikten jaǵalaý boıymen júgirgen. Shamamen 900 metr júgirgen soń «kómektesińder, men tońdym« degen jigittiń daýysyn estip, oılanbastan sýǵa túsip, qutqarý arqanyna baılanǵan sheńberdi laqtyrady. Sóıtip sheńberdi ustap úlgergen er adamdy sýdan jaǵalaýǵa shyǵaryp, birden jedel járdem shaqyrtqan», - dep habarlady qalalyq Polıtsııa basqarmasynyń baspasóz qyzmeti.
Anyqtalǵandaı, 26 jastaǵy turǵyn mas kúıde bolǵan. Ol óz áreketiniń sebebin túsindire almady.
