Óskemendik polıtseı sýǵa kete jazdaǵan áıeldi qutqaryp aldy
NUR-SULTAN. QazAqparat - Óskemen qalasynyń Polıtsııa basqarmasy Ertis aýdandyq bóliminiń aǵa ınspektory Asqar Quljynov Úlbi ózenine batyp kete jazdaǵan áıeldi qutqaryp aldy, dep habarlaıdy QazAqparat tilshisi.
Búgin túngi saǵat 01:00-ge taıaý bolǵan oqıǵany Asqar Quljynov QazAqparat tilshisine aıtyp berdi.
«Túngi kezekshilikke túsken edim. Krylov ózenine jaqyn jerdegi Úlbi ózeniniń tusynda belgisiz áıeldiń sýǵa sekirgeli turǵany týraly habarlama kelip tústi. Protozanov kóshesimen kele jatyp, kópirdiń astymen kólikpen óte shyǵatyn jol bar. Sol jaqqa barsam, álgi áıel kópirdiń ortańǵy baǵanynda tur eken. Batyp ketý qaýpi baryn túsindirgenimizge kóngisi kelmedi», - deıdi Asqar Quljynov.
Aqyry, tártip saqshysy kópirdiń ústimen baǵanǵa órmelep túsip, áıelge jaqyndaǵan. Alaıda ony kórip qalǵan áıel ózenniń tereń bóligine sekirip ketken.
«Aqyry, sýǵa súńgip, bata jazdaǵan áıeldi qutqaryp aldym», - deıdi Asqar Quljynov.
Qazirgi ýaqytta istiń mán-jaıy zerttelý ústinde. Óskemendiktiń nelikten mundaı áreketke barǵanyn quqyq qorǵaýshylar anyqtap jatyr.
