Óskemendik polıtseı aýlasyn sý basqan ájeıdi arqalap alyp shyqty

ÓSKEMEN. QazAqparat - Óskemenniń irgesindegi Praporşıkovo aýylynyń ýchaskelik polıtsııa qyzmetkeri aýlasyna sý jaıylǵan ájeıdi qaýipsiz jerge arqalap alyp shyqty, dep habarlaıdy QazAqparat tilshisi.

«Kúndelikti ádet boıynsha tań ata aýyldy aralap júrgenmin. Aıazdy kúnderi ýaqytpen sanaspaýǵa týra keledi. Oqys jaǵdaıǵa ushyraǵandar bolýy múmkin. Sóıtip júrip, kóktemde ǵana arnasynan shyǵatyn aryqtardyń jaıylyp ketkenin baıqadym. Sol kezde esime shetki kósheler tústi, - deıdi Rýslan Orazametov.

Osy oımen ol Ertistiń arnasyna jaqyn jatqan Kırov kóshesinde ájesi turatyn Aıjan Anýarbekovaǵa habarlasady. Aıjan ájesine qońyraý shalyp, aýlaǵa sý jaıyla bastaǵanyn biledi.

Ekeýmiz kólikke otyra salyp ájemniń úıine keldik. Aýladan kirý múmkin emes eken. Qyzyl sý 30 santımetrdeı kóterilipti. Kórshi úıdiń aýlasy arqyly ishke kirdik. Rýslan aǵa ájemdi arqalady, men úshinshi synypta oqıtyn sińlimdi kóterip aldym. Toǵyzynshy synypta oqıtyn sińlim aıaǵyna dorba kıip, bizdiń izimizben shyqty, - deıdi Aıjan.

Aıjannyń aıtýynsha 80 jastaǵy ájesi úıin tastap shyqqysy kelmegen. Sý tabaldyryqpen teńeskenin kórgennen keıin ǵana polıtseıdiń sózine kónipti.

Qazir qyzyl sý arnasyna túsipti. Ájeı men nemereleri óz úılerine oraldy.

«Bizdiń ýchaskelik polıtsııa óte qyraǵy. Aýylda bolyp jatqan oqıǵanyń barlyǵyna qulaq túrip, nazar salyp júredi. Ájemdi úıden alyp shyqqanda qujattarmen qosa balalardyń oqý quraldaryn da ala shyqty. Baǵymyzǵa oraı sý úıge kirmepti. Tek eski aldyn muz alyp qalǵan», - deıdi A.Anýarbekova.

 

Eske sala keteıik, ShQO-daǵy aýylǵa qyzyl sý jaıylǵandyǵy týraly buǵan deıin habarlaǵan bolatynbyz.