Óskemendik oqýshylar antıseptık shashatyn robot jasady

ÓSKEMEN. QazAqparat – Óskemen qalasynda bıylǵy Balalar jylyna oraı oqýshylar men stýdentter arasynda IT-festıval ótti, dep habarlaıdy QazAqparat tilshisi.

«New generation» dep atalatyn festıvalde oblystyń túkpir-túkpirinen mektep oqýshylary men kolledj, ýnıversıtet stýdentteri qatysty. Bilim salasyndaǵy aýqymdy ІT-kórmede balalar men jastar óz jobalaryn kórsetip, oı-pikir, tájirıbe almasty.

«Búgin festıvalde óz jobamyzdy – antıseptık shashatyn robotty usynyp otyrmyz. Ol datchık arqyly jumys isteıdi, qazaq tilinde erkin sóıleıdi jáne koronavırýs ınfektsııasynyń aldyn alý týraly nusqaýlar beredi. Qazir bul robotty mektebimizge ornatyp qoıdyq», - deıdi O.Bókeı atyndaǵy №44 lıtseı-mektebiniń oqýshylary Dilnaz Nábıolda jáne Dııas Ermuhanbetov.

Qatysýshylar 6 baǵyt boıynsha óz jumystaryn usyndy, atap aıtqanda «Kids Skills», «Maker Fest», «Junior Skills», «Startup-jobalar», «Robotime», «ClusterPro». Olardyń ishinde qaýipsizdikti uıymdastyrýǵa, oıyn oınaýǵa, oqytýǵa qatysty joba jasaǵandar boldy.

Festıval barysynda ǵylymı oıyn-saýyq alańy usynyldy. Munda kelýshiler zamanaýı tehnologııalar salasyndaǵy sońǵy jetistiktermen tanysýǵa múmkindik aldy.

Esterińizge sala ketsek, osyǵan deıin Shyǵys Qazaqstanda bıyl 7,5 myń túlek UBT tapsyratyndyǵyn habarlaǵan edik.