Óskemendik qutqarýshylar úıindi astynda qalǵan jumysshyny qazyp aldy
ÓSKEMEN. QazAqparat - Óskemende aryq qazyp jatqan jumysshy úıindi astynda qalyp qoıdy, dep habarlaıdy QazAqparat tilshisi.
Bajov kóshesiniń boıynda aryq qazyp jatqan jumysshy kenet opyrylǵan dymqyl topyraqtyń astynda qalyp qoıǵan. Bul kezde onyń qasynda úsh áriptesi bolǵan. Jumysshylar der kezinde qutqarýshylardy shaqyryp úlgergen. Aryqtyń tereńdigi 2 metr bolǵanyna qaramastan, basyn topyraq baspaǵan. Kýágerler úıindiniń aýyr bolǵany sonshalyq, ýaqyt ótken saıyn astyndaǵy adamnyń tynys alýy qıynǵa soqqanyn aıtady. Shyǵys óńirlik aeroutqyr qutqarý jasaǵynyń mamandary ony kúrekpen arshyp alǵan.
«Qutqarý jumystary 1 saǵatqa sozyldy. Eń bastysy, ol esten tanǵan joq, bizben sóılesip jatty», - deıdi qutqarý jasaǵynyń basshysy Sergeı Golýbev.
Zardap shegýshi úıindi astynan shyǵarylǵan bette jedel járdem qyzmetkerlerine tapsyryldy. Onyń denesinen eshbir synyq pen jaraqattyń belgisi baıqalmaǵanymen, tolyq zertteýden ótkizý úshin aýrýhanaǵa jatqyzyldy.
