Óskemendik kelinshek jaldap turǵan baspanasyndaǵy búkil tehnıkany satyp jibergen
ÓSKEMEN. QazAqparat - Óskemende polıtseıler ózi jalǵa alyp otyrǵan páterdi tonap ketken áıeldi anyqtap, ustady, dep habarlaıdy «QazAqparat» HAA tilshisi.
Qalalyq polıtsııaǵa Şerbakov kóshesindegi jeke turǵyn úıdiń 65 jastaǵy ıesi habarlasyp, jalǵa bergen baspanasynan búkil turmystyq tehnıka joǵalǵanyn aıtqan. Páterdi jaldap turǵan kelinshekke telefon soǵyp, habarlasa almaǵan.
Onyń sózine qaraǵanda, joǵalǵan zattardyń jalpy quny 370 000 teńgeden asyp jyǵylady. Quqyq qorǵaý organdary urlyqty sol úıdi buryn jaldap turǵan oblys ortalyǵynyń 37 jastaǵy turǵyny jasaǵanyn anyqtady. Ol polıtsııa aldynda óz qylmysyn moıyndap, urlanǵan zattyń bir bóligin satyp, aqshasyn jaratyp jibergenin aıtty.
Aıta keteıik, ózi de sol kósheniń boıynda turatyn turǵyn úı ıesi eki aı boıy tehnıkalardyń shyǵarylyp jatqanyn ańǵarmaǵan. Baspanany jalǵa alǵan kelinshekke qatysty sotqa deıingi tergep-tekserý bastaldy.
