Óskemendik kásipker damýynda aýytqýy bar balalarǵa arnalǵan balabaqsha ashty
ÓSKEMEN. QazAqparat – Óskemen qalasynda kásipker Lılııa Mambýrova damýynda aýytqýy bar balalarǵa arnalǵan balabaqsha ashqan. Búginde mektepke deıingi mekemede 40-qa jýyq bala oqýda, dep habarlaıdy QazAqparat.
Óskemende damýynda aýytqýy bar úsh jastan alty jasqa deıingi búldirshinderdiń sany 1400-den asady. Olar bilim alý úshin arnaıy mekemelerge baryp oqýlary kerek. Alaıda osy ýaqytqa deıin shaharda aýtıstik spektri buzylǵan balalarǵa arnalǵan balabaqsha bolǵan emes. Muny eskergen kásipker Lılııa Mambýrova ıgi sharany qolǵa alyp, osyndaı mektepke deıingi mekeme ashty. Erekshe qajettiligi bar balaǵa qalaı qaraý kerektigin ol jaqsy biledi. Sebebi onyń qyzy 5 jastan asqanǵa deıin múlde sóıleı almaǵan.
«Dárigerler balama aýtıstik spektrdiń buzylýy degen dıagnoz qoıdy. Kómek surap júgingen mamandardyń barlyǵy maǵan biraýyzdan «balańyzdy emdeý múmkin emes» degendi aıtty. Alaıda úmitimdi úzbeı, basqa amaldardy qarastyra bastadym. Baıqaǵanymdaı, qalada erekshe qajettiligi bar balaǵa tıisti kómek kórsetetindeı birde bir mamandandyrylǵan mekeme joq eken», - deıdi Lılııa Mambýrova.
Oılana kele ol sondaı mekemeni ózi ashýǵa bel baılaǵan. Búginde jospary iske asyp, «Ǵajaıyptar mekeni» atty balabaqsha jumys istep tur. Bul jerde damýynda aýytqýy bar balaqaılar ınklıýzıvti synyptarynda oqyp, qoǵamda ómir súrýdiń áleýmettik, kommýnıkatıvti, kúndelikti daǵdylaryn úırenýde. Defektolog, neıropsıhologtar balalarmen jumys isteýdiń zamanaýı ádisterin qoldanady. Olar AQSh, Reseı, Polsha elderinen shaqyrylǵan mamandardan dáris alǵan.
«Qazir osynyń nátıjesinde tili shyqqan qyzymnyń tanymdyq daǵdylary damı bastady. Onyń bolashaqta bir mamandyq ıesi atanyp, el qatarly ómir súre alatynyna senimim kámil. Balabaqshany «Ǵajaıyptar mekeni» dep ataýymyzdyń da sebebi bar. Munda kún saıyn keremet bir oqıǵa bolyp jatady. Mysaly osy ýaqytqa deıin sóılemegenderdiń tili shyǵyp, adamǵa týra qaraı almaıtyndar kózin tiktep qarap jáne sol sııaqty basqa da ǵajaıyptar oryn alady. Osyndaıda jan saraıymyz jadyrap, keýdemizdi qýanysh kerneıtini ras. Ata-analardyń rızashylyǵy bizge qanat bitiredi», - deıdi kásipker.
Onyń aıtýynsha, múmkindigi shekteýli balalardy emdeýdi, qoǵamǵa beıimdeýdi kishkentaı kezinen bastaý kerek. Ýaqtyly kómek kórsetip, ońaltý jumystaryn júrgizgen jón.
«Kóp jaǵdaıda ata-analar damýynda aýytqýy bar balasymen qalaı sóıleserin de bilmeı jatady. Sol úshin bizdiń balabaqshadaǵy arnaıy psıholog apta saıyn olarmen kezdesip, bárin búge-shúgesine deıin túsindiredi. Balany durys ádis-tásilmen oqytý arqyly úlken nátıjelerge qol jetkizýge bolady. Eń bastysy, eshqashan berilmeý kerek. Bizdiń balabaqshadan bitirgen balaqaılar qatarlastarynan qalmaı mektepke de bara alatyn jaǵdaıǵa jetedi», - deıdi Lılııa Mambýrova.
Naýryz aıynan bastap mektepke deıingi mekeme balalardy jańasha qabyldaıtyn bolady. Naqty aıtsaq, tolyq kúndik topqa jazylǵandar saǵat tańerteńgi 09.30-dan keshki 17.30-ǵa deıin, jarty kúndiktegiler tańerteń jáne tústen keıin 4 saǵattan bilim almaq. Qalalyq ákimdiktiń áleýmettik qoldaýynyń arqasynda búldirshinderge belgili bir jeńildik te jasalǵan.
«Aldaǵy ýaqytta Eýropa elderiniń birine baryp, biliktiligimdi arttyrýdy uıǵardym. Kórgenimdi, sanaǵa túıgenimdi qaramaǵymdaǵy mamandarǵa úıretpekshimin. Bir orynda turmaı únemi damı berý kerek. Jýyqta balabaqshada basseın ashyldy. Keleshekke de josparlarymyz kóp», - deıdi kásipker.
