Óskemendik kásipker 2,8 mlrd teńgeniń salyǵynan jaltarǵan
ÓSKEMEN. QazAqparat - 2016 jyldan beri 2,8 mlrd teńgeniń salyǵynan jaltaryp kelgen óskemendik kásipker 5 jylǵa sottaldy, dep habarlaıdy QazAqparat tilshisi.
Taýar satyp, júk tıeý jáne tasymaldaý qyzmetimen aınalysqan 39 jastaǵy kásipker 2016 jyldan beri birneshe ret salyqtan jaltarǵan. Ol úshin kásipker azamattyq nekedegi áıeli men onyń týystarynyń atyna birneshe jaýapkershiligi shekteýli seriktestikti tirketedi. Atalmysh kompanııalardyń móri men qujattary, salyq deklaratsııasyn tapsyrýǵa arnalǵan elektrondy kiltter kásipkerdiń óz qolynda bolǵan. Al seriktestikterdiń jasandy ıeleri bul iske kóz juma qaraǵany úshin aı saıyn ondaǵan myń teńge kóleminde «syıaqy» alyp otyrǵan.
Asa iri kólemde alypsatarlyqpen aınalysqan kásipker úsh jyldyń ishinde 2,8 mlrd teńgeniń salyǵyn jasyryp qalǵan. «300.08» formadaǵa salyq deklaratsııasyn tapsyrý kezinde túsken tabys mólsherin burmalap, kórsetilgen qyzmet kólemi týraly jalǵan shot-faktýra usynyp otyrǵan. Memlekettik kiris departamentiniń mamandary kásipkerdiń salyq deklaratsııasyndaǵy derekter men naqty tabysyn salystyrý barysynda burmalaýshylyq baryn anyqtap, tekserý júrgizý týraly sheshim qabyldapty. Kásipker sot aldynda óz kinásin moıyndady.
«Sot ony Qylmystyq kodekstiń eki birdeı baby boıynsha kináli dep tapty. Kásipkerdiń kámelettik jasqa tolmaǵan balasy bar ekeni eskerilip, kinásin tolyq moıyndaǵandyqtan 5 jylǵa bas bostandyǵynan aıyrý jazasy taǵaıyndaldy. Onyń ústine memleketten jaltarǵan 2,8 mlrd teńgeni qaıtarýǵa mindetteldi. Prokýrordyń 84 mln teńge kóleminde qosymsha memlekettik baj óndirip alý týraly talaby da qanaǵattandyryldy» - delingen Óskemen qalasynyń №2 sotynyń baspasóz qyzmeti bergen málimette.
