Óskemendik ekologtar polıetılen paketten bas tartpaq
ÓSKEMEN. QazAqparat - Ekologııalyq qaýipsizdik ortalyǵy ShQO Ekologııa departamentiniń qoldaýymen «Jasyl keńse» aktsııasyn jarııalap, qyzmetkerler bir apta boıy plastık paketti paıdalanýdan bas tartady, dep habarlaıdy QazAqparat tilshisi
Uıymdastyrýshylardyń aıtýynsha, sarapshylar ekologııalyq zııandy polıetılensiz «kún kórýge» bolatynyn óz qoldyramen teserip, Óskemen qalasy turǵyndaryna plastıkalyq qaldyqtardy azaıtý ıdeıasyn nasıhattamaq. Ekologtar bir apta boıy eko sómkeler, bıologııalyq ydyraıtyn nemese qaǵazdan jasalǵan paketter ustamaq.
«Polıetılen paketter, bir ret qana qoldanylatyn plastık buıymdar zamanaýı adamdar úshin tańsyq dúnıe emes, biraq onyń qorshaǵan ortaǵa zııany ushan-teńiz ekenine eshkim mán bermeıdi. Mundaı paketter ydyraý úshin 400 jyl ýaqyt kerek, ol ýaqyt aralyǵynda ol aýaǵa zııandy zattar bólip, ártúrli dertterdiń týýyna sebep bolady», - deıdi Ekologııalyq qaýipsizdik ortalyǵynyń mamany Elena Polıantseva.
Óskemen qalasynda jyl boıy 100-150 mıllıon polıetılen paket pen qap qoqysqa tastalady. Qarapaıym tilmen túsindirgende, ol 20-40 vagonga tıelgen qoqyspen teń.
«Biz oılana kele osyndaı sheshimge keldik: bireýge birdeńe úıretpes buryn ózińnen bastaý kerek. Aktsııa qalaı ótip jatqanyn, qandaı nátıje bolǵanyn, aldaǵy ýaqytta eskeretin jaıttar týraly áleýmettik jelilerdegi paraqshamyzda jarııalap otyramyz», - deıdi maman.
