Óskemendik depýtattar dúken aralap, azyq-túlik baǵasyn tekserýde
ÓSKEMEN. QazAqparat – Óskemen qalasynda qant baǵasyn kótergen kásipkerge qatysty hattama toltyryldy, dep habarlaıdy QazAqparat.
Qalalyq máslıhat depýtattary saýda oryndaryndaǵy azyq-túlik baǵasyn baqylaý maqsatynda kezekti reıd júrgizdi. Búginde halyq qalaýlylary 3 topqa bólinip jumys isteýde.
«Birinshi jumys toby azyq-túlik baǵalaryn baqylaýda. Ekinshi top iri saýda jáne oıyn-saýyq ortalyqtarynyń sanıtarlyq jaǵdaıyna tekserý júrgizse, úshinshi top qoǵamdyq kólikterde júrgizilip jatqan dezınfektsııalaý sharalaryn tekseredi. Tekseris barysynda qandaı da bir quqyq buzýshylyq anyqtalsa dereý tıisti shara qoldanylady», – dep túsindirdi Óskemen qalalyq máslıhatynyń hatshysy Aleksandr Svetash.
Arnaıy komıssııa qaladaǵy birneshe kóterme saýda ortalyqtaryn aralady. Nátıjesinde qant baǵasyn negizsiz kótergen kásipker anyqtalyp, oǵan qatysty hattama toltyryldy.
Esterińizge sala ketsek, osyǵan deıin de Óskemende qant baǵasyn qymbattatqan kásipkerler anyqtalǵan bolatyn.
