Óskemendik boıjetken 7 jyl boıy ekovolonterlikpen aınalysyp keledi
ÓSKEMEN. QazAqparat – Ekologııa máselesiniń kúnnen kúnge ózektiligi artyp kele jatqany jasyryn emes. Jer planetasy úlken qoqys polıgonyna aınalyp ketpesin dep shyryldap júrgender bar. Óskemen qalasynda turatyn Lıýdmıla Evjenkova sondaı jandardyń biri, dep habarlaıdy QazAqparat.
Ekovolonter belsendi jastardy bir qozǵalysqa baǵyttap, senbilikterge júzdegen adamdy jınap júr. Qoqystyń qaıda shashylǵanyn kórseńiz, Lıýdmılany sol jerdeı izdeı berińiz. Tipti onyń paketten jasalǵan kıim kıip, jol jıegindegi qoqys ústinde jalǵyz ózi turǵan art-aktsııasy oblystyń ǵana emes, respýblıka jurtshylyǵynyń nazaryn aýdarǵan.
Bári qalaı bastaldy ?
Osydan jeti jyl buryn Lıýdmıla Evjenkova Altaı aýdanyndaǵy Jańa Buqtyrma demalys bazasynda dúkenge qaraı bet túzep bara jatqan. Jol boıynda kúnde shashylyp jatatyn qoqysty kórgende bul joly onyń shydamy taýsyldy.
«Ózim júretin joldy qoqystan tazartý qolymnan keledi ǵoı. Onda ne sebepti qoqysty basqa bireýdiń jınaǵanyn tosyp júrýim kerek» dep oılady. Sóıtip, osyǵan nemquraıly qaramaı, tazalyq úshin kúresýge bel sheshken. Mine, sodan beri Lıýdmıla ekovolonterlik baǵyttan bir sátke de taıǵan emes.
– Qurbym ekeýimiz qolymyzǵa paket alyp, joldy aınadaı qyldyq. Sodan keıin basqa joldardy da tazalaýǵa kóshtik. Osydan soń senbilikterge jıi baryp turdyq. Bizge unady. Qoǵamǵa tamshydaı bolsyn paıda ákelip jatqanyńdy sezedi ekensiń, – deıdi ol.
Áleýmettik jelilerde «Taza Buqtyrma» paraqshasyn ashqan keıipkerimiz tutas bir qozǵalys uıymdastyryp, óz betterimen senbilikter uıymdastyryp turdy. Olar jaǵalaýdy, demalys oryndaryna aparatyn jol jıegin beı-bereket shashylǵan qoqystan tazartty.
Aktsııa arqyly konteıner ornatqan
2021 jyly Lıýdmılany respýblıkalyq telearnalardan, saıttardan búkil Qazaqstan kórdi. Buǵan onyń joldyń shetinde qoqys úıindisiniń ústinde paketten jasalǵan kıim kıip, jalǵyz ózi 1 saǵattaı turǵany sebep bolǵan. Denesine «MEN/BІZ Jer planetasy» dep jazylǵan.
– Art-aktsııa ótkizýimniń negizgi maqsaty – demalys aımaǵynyń syrtyna kommýnaldyq qyzmetterdiń balansynda bolatyn qoqys tastaýǵa arnalǵan konteınerlerdi ornatý máselesine bıliktiń nazaryn aýdartý. Osyǵan deıin birneshe jyl boıy jergilikti ákimdikke baryp, jaǵdaıdy aıtqanymyzben esh nátıje shyqpaǵan-tuǵyn. Aktsııa barysynda polıtsııa qyzmetkerleri eki ret keldi. Qasymdaǵy eriktiler maqsatymyzdy túsindirdi. Al men bolsam 1 saǵat boıy únsiz, qımyl-qozǵalyssyz turdym. Saqshylar eshqandaı zańdy buzbaǵanymyzdy kórip, ketip qaldy, – deıdi Lıýdmıla Evjenkova.
Osydan keıin máselege ákimdik nazar buryp, kópten kútken qoqys konteınerleri ornatylǵan. Qazir názik jannyń uıymdastyrǵan senbilikterine bir mezette 100-150 adam jınalady. Ýaqyt ótken saıyn qozǵalysqa qosylyp jatqandar sany artyp keledi.
Qaıyrymdylyqpen de aınalysýda
– Óskemen qalasy jáne Altaı aýdany Jańa Buqtyrma kenti ákimdikterimen tyǵyz baılanystamyz. Jergilikti kommýnaldyq qyzmettermen de qoıan-qoltyq jumys istep jatyrmyz. Áleýmettik jelide oqyrmandarym kóbeıe kele, tek ekovolonterlikpen emes, qaıyrymdylyqpen aınalysýǵa bel baıladym. Qarjy jınastyryp, kópbalaly otbasylarǵa, muqtaj jandarǵa kerek-jaraqtaryn alyp berýdemiz. Qazirgi qant tapshylyǵyna oraı 40 qap qant alyp, turmysy tómenderge jetkizýdemiz, – deıdi volonter.
Onyń aıtýynsha, qalaǵa qoqysty suryptap jınaý úshin arnaıy konteınerler ornatylǵanymen halyq ondaǵy maqsatty túsingen joq. Keıbireýler qoqysty tıisti konteılerlerge bólip emes, áli de baıaǵydaı laqtyrýda.
– Sol úshin jurtshylyqqa túsindirý jumystaryn júrgizýge tyrysamyn. Jeli arqyly qoıylǵan suraqtarǵa jaýap berip, osy turǵyda bolyp jatqan sońǵy ózgeristerdi, jańalyqtardy bólisip kelemin. Azamattar «ákimdik qaıda qarap otyr?!» dep dıvanda jata bermeı, áreket etýi kerek. Judyryqtaı jumylsaq alynbaıtyn qamal joq. Ár adam ózinen bastaýy tıis. Demalys ornynda, kóshede qoqysty tek jáshikke tastap júrińiz. Tazalyqty saqtaıyq!, – deıdi Lıýdmıla.
Shaharda osyndaı belsendiniń bar ekendigin bilgen turǵyndar oǵan habarlasyp, kómek surap jatady. Keıipkerimiz ár kisiniń máselesine qulaq túrip, qolushyn sozýǵa árkez ázir.
