Óskemendik áıel áskerı jasaqqa pyshaqpen shabýyl jasady
ÓSKEMEN. QazAqparat - Ulttyq ulannyń «Shyǵys» óńirlik qolbasshylyǵyna qarasty №5518 áskerı bólimniń úsh adamdyq jasaǵyna mas áıel bákimen shabýyl jasaǵan, dep habarlaıdy QazAqparat tilshisi.
Óńirlik qolbasshylyqtyń baspasóz qyzmetiniń habarlaýynsha, Vıktor Maslov, Qazybek Túıten jáne Mıras Baltabekov úshtiginen qurylǵan patrýldik jasaq Óskemen qalasynyń «Zaşıta» aýdanynda qoǵamdyq qaýipsizdik kúzetinde júrgen. 30 jas shamasyndaǵy belgisiz áıel olarǵa pyshaq ala júgirgen.
«Bári aıaq astynan boldy. Basynda onyń áreketterin túsinip úlgermedik. Ózimizdi tanystyryp, hal-jaǵdaıyn surap turǵanymyzda ol pyshaq ala júgirdi. Bákiniń ushy áskerı kıimimdi tesip ketti. Osydan keıin qasymdaǵy sarbazdarǵa ony ustaýdy buıyrdym. Ony shalyp qulatyp, sýyq qarýyn tartyp aldyq» - deıdi Vıktor Maslov.
áıeldiń S.O. Ilchenko degen azamatsha ekeni belgili bolǵan. Ol buǵan deıin terrorlyq akt týraly jalǵan aqparat bergeni úshin jáne usaq alaıaqtyq úshin eki ret sottalypty.
Narkologııalyq tekserý áıeldiń ortasha deńgeıde mas ekenin anyqtady.
«Mundaı sátte oqıǵany durys baǵalaı bilý kerek. Názik jandy eken dep, saqtyqty joǵaltýǵa bolmaıdy. Qolynda sýyq qarýy bar adamnyń bári qoǵam úshin qaýipti. Bizdiń jasaq sol qaýipti ózderine qabyldap, mas áıeldi der kezinde tynyshtaldyrdy» - deıdi №5518 áskerı bólimniń batalon komandıriniń orynbasary Nurlan Báshenov.
S.O. Ilchenko Úlbi polıtsııa bólimine tabystaldy.
