Óskemendi qoıý tútin basty
ÓSKEMEN. QazAqparat - Jeksenbi kúni keshke Óskemen qalasynyń aspanyn qoıý tútin basty, dep habarlaıdy QazAqparat tilshisi.
Oblystyń Tótenshe jaǵdaılar qyzmeti turǵyndardy alańdamaýǵa shaqyryp, tútin sońǵy kúnderi jıi oryn ala bastaǵan qurǵaq shóptiń janý oqıǵalarymen baılanysty ekenin aıtýda.
Óńirlik TJD-dan málim etkendeı, Shyǵys Qazaqstan oblysynda tutanǵan qurǵaq shópti sóndirýge kúnine 30-ǵa jýyq órt sóndirý bólimshesi attanady. Tek Óskemen qalasy boıynsha qutqarýshylar jalynmen kúreske 15 ret shyqqan.
Shuǵyl málimetter boıynsha, qazir janý faktisi áýejaı mańynda Ertis ózeniniń ortasyndaǵy aralda tirkelip otyr. Oqıǵa ornyna jetý qıyndyq týdyrýda. Janyp jatqan shóptiń aınalasy sý bolǵandyqtan, onyń jaqyn ornalasqan turǵyn úılerge qaýpi joq.
Tutaný oqıǵalaryna ystyq kún raıy da yqpal etýi múmkin. Jeksenbi kúni oblys boıynsha aýa temperatýrasy 33 gradýstan joǵary boldy. Órt sóndirýshiler adamdardyń abaısyzdyǵy men selqostyǵyn da joqqa shyǵarmaıdy.
ShQO TJD azamattardy alańdamaýǵa shaqyrady. Órt sóndirý bólimsheleri kúsheıtilgen rejimde jumys isteýde.
