Óskemendegi jylý ortalyǵynda eki qazandyqty kúrdeli jóndeý aıaqtaldy

ÓSKEMEN. QazAqparat – Óskemen qalasyndaǵy jylý elektr ortalyǵynda eki qazandyqty kúrdeli jóndeý jumystary aıaqtaldy, dep habarlaıdy QazAqparat tilshisi.

ShQO ákimdiginiń málimetine súıensek, Óskemen irgesindegi Sogra JEO-da júrgizilip jatqan jóndeý jumystary jylytý maýsymy bastalǵanǵa deıin tolyq aıaqtalady.

«Bul ortalyq 2018 jyly jeke menshikke berilgen. Sol kezde jabdyqtardyń 85 paıyzdan astamy tozyp turǵan edi. Qazir munda eki qazandyqty kúrdeli jóndeý jumystary aıaqtaldy. Úshinshi qazandyqta, eki týrbınada jáne eki transformatorda jumystar aıaqtalýǵa jaqyn. Barlyq qajetti jabdyqtar ótken jyldyń jeltoqsanynda jetkizilgen. Sondyqtan, kesteden keshigý joq», - delingen aqparatta.

Qazir jylý elektr ortalyǵynda 44 myń tonna qatty otyn bar. Bul 42 kúnge jetedi. «Qarajyra» kómir razrezimen jetkizý týraly sharttar jasaldy. Jylytý maýsymy bastalǵanǵa deıin kómirge táýliktik qajettilik - 735 tonna, al sýyq maýsym bastalǵanda - 1 065 tonna.

Eske salsaq, osyǵan deıin Rıdder jylý ortalyǵyndaǵy 4 qazandyq 20 qyrkúıekke deıin iske qosylatyndyǵy habarlanǵan.