Óskemendegi jylý ortalyǵynda byltyr aqaý shyqqan qazandyq kúzde jóndelip bitedi
ÓSKEMEN. QazAqparat – Óskemen qalasyndaǵy jylý elektr ortalyǵynda byltyr aqaý shyqqan qazandyq kúzge deıin jóndelip bitedi, dep habarlaıdy QazAqparat tilshisi.
Byltyr qarasha aıynda Óskemendegi jylý elektr ortalyǵynan aqaý shyqqan bolatyn. Datchıkterdiń durys jumys istemeýine baılanysty №15 qazandyq óship qalǵan.
Aldaǵy jylytý maýsymynda osyndaı jaǵdaı qaıtalanbas úshin atalǵan qazandyq jóndeýden ótýde. Búginde jóndeý jumystaryna merdiger uıymnyń 40-tan astam adamy jumyldyrylǵan.
«Barlyǵy josparǵa sáıkes júrgizilýde. Kesteden aýytqýshylyq joq. №15 qazandyq qazan aıynyń basynda jóndelip bitedi. Jylytý maýsymy qyrkúıektiń sońynda bastalýy múmkin. Biraq bul jylý berilýine eshqandaı áser etpeıdi. Barlyǵy qalypty rejımde bolady», - deıdi «Óskemen JEO» JShS tehnıkalyq dırektory Nurlan Ahmedjanov.
Onyń aıtýynsha, jylý ortalyǵynda qajetti kómir qory bar. Qosymsha kómir qyrkúıek aıynda jetkizile bastaıdy.
Eske salsaq, osyǵan deıin Rıdder jylý ortalyǵyndaǵy jóndeý jumystaryna 200-den astam adam tartylǵany habarlanǵan.
