Óskemendegi jabaıy jaǵajaı zamanaýı sporttyq saıabaqqa aınaldy
ÓSKEMEN. QazAqparat – Óskemenniń ortasynda zamanaýı jaǵajaıy bar «Samal» sporttyq-saýyqtyrý saıabaǵy ashyldy, dep habarlaıdy QazAqparat tilshisi.
Jyldar boıy Ertis pen Úlbi ózenderiniń toǵysqan tusyn óskemendikter jabaıy jaǵajaı retinde paıdalanyp kelgen bolatyn. Tótenshe jaǵdaı jáne sanıtarlyq qadaǵalaý organdary atalmysh aýmaqta sýǵa shomylýǵa bolmaıtynyn maýsym saıyn eskertkenimen, qalanyń ishindegi qolaıly orynnan jaz boıy jurt arylmaıtyn. Jaǵalaýdyń mańynda 20 gektar bos aýmaq baryn bilgen oblys ákimdigi atalmysh oryndy barlyq talapqa saı jaǵajaı etip jasap shyǵardy. Oǵan «Samal» degen at bergen. Saıabaqtyń ashylý saltanatyna oblys ákimi Danıal Ahmetov qatysty.
«20 gektardan astam aýmaqta arqan parki, balalarǵa arnalǵan jasandy toǵan, balalar úshin jeke jaǵajaı, shyńǵa órmeleıtin qabyrǵa, trıbýnasy bar úlken tennıs korty, rollerdrom, basketbol jáne fýtbol alańdary jabdyqtalǵan. Qysta bul alańdar muz aıdyny men skeıtparkke aınalady. Bul zamanaýı keshen balalar men eresekterge dene shynyqtyrýǵa, sportpen aınalysýǵa úlken múmkindikter ashady. Saıabaq tek sportshylar úshin ǵana emes, barlyq dene shynyqtyrý áýesqoılary úshin salynǵan», - dedi Danıal Ahmetov.
Onyń aıtýynsha, saıabaq aýmaǵynda tipti, trıatlon saıystaryn ótkizýge bolady. Oǵan qajetti jaraqtar men ınfraqurylym tolyqtaı qurylǵan.
«Eldi mekenderdi abattandyrýrǵa erekshe kóńil bólip otyrmyz. Parkter men demalys oryndary, aýlalar abattandyrylyp, balalarǵa arnalǵan oıyn alańdary men sport alańdary ornatylýda. Bul baǵytta barlyǵy 180 joba qolǵa alynǵan. Qazan aıynyń basyna deıin sonyń bári qoldanysqa beriledi», - dedi ákim.
Al 2021 jyly oblys ortalyǵyndaǵy «Metallýrg» saıabaǵy tolyqtaı kúrdeli jóndeýden ótkizilmek.
