Óskemendegi Voroshılov kóshesi Shákárim dańǵyly bolyp ózgeredi
ÓSKEMEN. QazAqparat - Óskemendegi Voroshılov kóshesi Shákárim atyndaǵy dańǵylǵa aınalýy múmkin. Kóshelerdi qaıta ataý boıynsha turaqty komıssııanyń qoǵamdyq tyńdaýynda osyndaı sheshim qabyldandy, dep habarlaıdy QazAqparat tilshisi.
Áýeli oblys ortalyǵyndaǵy 23 ataýsyz kóshege esim úlestirildi. Onyń kóbi Aqbaýyr, Tolaǵaı, Aqshoqy, Arasan degen sııaqty qasterli meken ataýlaryna ıe boldy.
Al uzyndyǵy 3,6 shaqyrym bolatyn, boıynda 5000-nan astam halyq turatyn Voroshılov kóshesine Jaqııa Shaıjúnisov pen Shákárim Qudaıberdiuly esimderin berý týraly eki usynys kóterildi. Alǵashqy usynysty «Tsentr aktıvnogo dolgoletııa» áleýmettik bastamalar qory men «Kazgıprotsvetmet» JShS ujymy bergen. Al Shákárim Qudaıberdiulynyń esimi Qazaqstan jazýshylar odaǵy oblystyq fılıalynyń, Mádenıet, sport jáne aqparat salasy qyzmetkerleri kásipodaq uıymynyń óńirlik fılıalynyń jáne «Altaı asýy» qoǵamdyq birlestigi tarapynan usynylǵan. Turǵyndar arasynda kósheniń atyn keńestik ataýymen qaldyrý kerektigin aıtqandar da tabyldy. Taraptardyń pikirin tyńdaı kele, qalalyq máslıhat depýtattary Shákárim Qudaıberdiulynyń esimin berý týraly usynysty biraýyzdan qoldady.
Budan bólek, Pıter kommýnarlary kóshesi Lev Tolstoıdyń atymen, Lenınogor kóshesi Temirjolshylar ataýymen, Komsomol kóshesi Jastar degen atpen qaıta ataldy.
Sondaı-aq, qalanyń qaq ortasyndaǵy «Jastar» saıabaǵyna Halyq qaharmany Qasym Qaısenovtiń esimi berildi. Osyǵan uqsas usynysty jyl basynda óńirdiń aqsaqaldary kótergen bolatyn.
«Usynystardy qalalyq máslıhattyń depýtattary bir aýyzdan qoldady. Qoǵamdyq tyńdaý boıynsha qaýly daıyndalyp, qujat endi respýblıkalyq onomastıkalyq komıssııaǵa jiberiledi. Aqyrǵy sheshim sol jerden shyǵady» - deıdi qalalyq máslıhattyń depýtaty Maırash Ekibasova.
