Óskemendegi turǵyn úılerdiń birine Abaıdyń sýreti salyndy
ASTANA. QazAqparat - Óskemen qalasyndaǵy basty kóshelerdiń biri sanalatyn Abaı dańǵylynyń toǵyz qabatty №1 úıine Abaı Qunanbaıulynyń sýreti salyndy, dep habarlaıdy «QazAqparat» HAA tilshisi.
Óskemen qalasy ákiminiń baspasóz qyzmetiniń basshysy Ásem Seksenovanyń habarlaýynsha, strıt art ádisi boıynsha salynǵan Abaıdyń beınesin almatylyq sýretshi salǵan. Buǵan deıin oblys ortalyǵyndaǵy taǵy bir úıge elimizge belgili hokkeıshi Talǵat Jaılaýovtyń sýreti salynǵan bolatyn. 
«Abaıdyń kitap ustaǵan sýreti beınelendi. Astyna aqynnyń óziniń «Adamzattyń bárin súı, baýyrym dep» degen qanatty sózi jazyldy. Sýrettiń avtory - Almatydaǵy óner akademııasynyń magıstranty Aıbek Nurbekov. Jýyq arada strıt art baǵytynda qalany kóriktendirýge atsalysyp júrgen komanda jańa jobaǵa kirisedi», - deıdi Ásem Seksenova.
Aıta keterligi, atalǵan jobalarǵa qalalyq bıýdjetten eshqandaı aqsha bólinbegen. Igi jumys demeýshiler arqyly júrgizilip jatyr.
