Óskemendegi tramvaı qatynasy jazda jandanady
ÓSKEMEN. QazAqparat - Óskemen qalalyq ákimdiginde «Tramvaı parki» JShS-na qatysty brıfıng ótti. 26 aqpanda toqtaǵan tramvaılar jazǵa qaraı qaıta jolǵa shyǵatyn boldy, dep habarlaıdy QazAqparat tilshisi.
Aıta keteıik, buǵan deıin bank aldyndaǵy qaryzy bastan asqan Óskemen tramvaı parkiniń múlki saýdaǵa qoıylyp, Ertis áleýmettik-kásipkerlik korporatsııasy satyp alǵan bolatyn.
BAQ ókilderiniń suraqtaryna jaýap bergen «Ertis» ÁKK basqarma basshysy Anton Kramarenko múlik qabyldaý tolyq aıaqtalǵanyn atady.
«Tramvaı parkiniń bastapqy baǵasy 853 mıllıon teńge bolyp belgilengen. Aýktsıon nátıjesinde biz ony 443,5 mıllıon teńgege satyp aldyq. Qazir satyp alý-satý qujattaryn tirketip jatyrmyz. 1-2 aıdyń kóleminde «Mýnıtsıpıaldy tramvaı parki» degen atpen zańdy tulǵa paıda bolady» -deıdi Anton Kramarenko.
Onyń aıtýynsha park qyzmetkerleri sońǵy 3 aı kóleminde aılyqtaryn almaǵan. Onyń jalpy jıyny 80 mln teńgeden asady. Saýda nátıjesi belgili bolǵannan keıin-aq ujymmen resmı kezdesý ótip, barlyq jalaqy bereshegi keshikpeı óteletini eskertilgen.
«Ujym osy kúıinde saqtalady. Bir de bir jumys orny qysqarmaıdy. Óıtkeni qazirgi 14 tramvaıdyń ústine Almatydan taǵy 13-in ákelemiz. Sonda qala boıynsha barlyǵy 27 tramvaı júretin bolady» - dedi Anton Kramarenko.
Korporatsııa ókiliniń aıtýynsha, Almatydan jetkiziletin tramvaılar da buryn qoldanysta bolǵan. Olardyń taǵany Óskemendegi tramvaı relsterine sáıkes kelgenimen, turqy 3 metrge uzyn kórinedi. Almatylyq tramvaılardy Shyǵystyń aıazdy klımatyna beıimdeý úshin qosymsha jylytý qondyrǵylary qoıylýy múmkin. Anton Kramarenko bolashaqta bul vagondardyń ornyn sý jańa tramvaılarmen aýystyrý josparlanǵanyn aıtady. Mýnıtsıpıaldyq park qurylyp, qarjy bólingennen keıin relster men elektr jelileri de jańartylmaq. Al jańadan qurylǵan parktiń halyqqa qandaı tarıfpen qyzmet kórsetetini ázirge belgisiz. Korporatsııa basshysy ázirge bul máseleniń basy ashyq ekenin atady.
Foto: chitalnya.ru
