Óskemendegi sý qoımasyn jalǵyz aqqý meken etip júr
ÓSKEMEN. QazAqparat – Óskemende jyly jaqqa ushpaı sý qoımasynda qalyp qoıǵan aqqýdyń taǵdyry kópti alańdatýda, dep habarlaıdy QazAqparat tilshisi.
ShQO orman sharýashylyǵy jáne janýarlar dúnıesi ınspektsııasynyń málimetinshe, áleýmettik jelilerde monıtorıng júrgizý barysynda Ablaketka kentinde ornalasqan «Ertis-2» saıajaı qaýymdastyǵynan tabylǵan aqqý jaıly materıaldar zerttelgen.
Atalǵan fakti boıynsha aýmaqtyq ınspektsııa mamandary Sol jaǵalaý haıýanattar baǵynyń ákimshiligimen kelissóz júrgizip, aqqýdy ustaǵannan keıin sonda ornalastyrýǵa ruqsat aldy.
«Jýyqta jedel áreket etý bóliminiń ınspektorlary sý qoımasyna bardy. Alaıda aqqýdy ustaý múmkin bolmady. Jabaıy qus janyna adam jaqyndaǵanda qaıta-qaıta ushyp ketedi. Aqqýdyń densaýlyǵy jaqsy. Qajet bolǵan jaǵdaıda monıtorıngti ary qaraı jalǵastyramyz» delingen málimette.
